पुणे: स्वातंत्र्यपूर्व काळात स्त्रियांना शिक्षणाचा अधिकार मिळवून देऊन महिलांसाठीचे पहिले (एस एन डी टी) विद्यापीठ स्थापन करणारे शिक्षणमहर्षी भारतरत्न डॉ धोंडो केशव कर्वे यांच्या नावे १९६३ साली स्थापन करण्यात आलेल्या कर्वे समाज सेवा संस्थेचा नुकताच वर्धापन दिन साजरा करण्यात आला त्यावेळी महर्षी आण्णांच्या विचाराना व स्मृतींना उजाळा देण्यात आला.
संस्थेचे सचिव एम. शिवकुमार, व्यवस्थापन मंडळ सदस्य वैजिनाथ बिरादार, महाविद्यालयाचे प्र. संचालक डॉ. महेश ठाकूर, रजिस्ट्रार विनायक कस्तुरे, प्रा. चेतन दिवाण व समन्वयक प्रसाद कोल्हटकर यांच्या प्रमुख उपस्थितीत भारतरत्न महर्षी डॉ धोंडो केशव कर्वे यांच्या प्रतिमेस पुष्पहार अर्पण करून अभिवादन करीत त्यांच्या विचाराना व स्मृतींना उजाळा देण्यात आला.
कार्यक्रमासाठी उपस्थित मान्यवर, समाजकार्य महाविद्यालयाचे शिक्षक व शिक्षकेतर कर्मचारी व सर्व संस्था कर्मचाऱ्यांचे स्वागत प्र. संचालक डॉ. महेश ठाकूर यांनी केले तसेच महर्षी अण्णांनी खडतर काळात गावोगावी पायी फिरून गोळा केलेल्या निधीच्या सहाय्याने उभ्या केलेल्या शिक्षण क्षेत्रामधील त्यांच्या पर्वतापेक्षा महान अशा अतुलनीय कार्याचा आढावा यावेळी आढावा घेण्यात आला.
कर्वे समाज सेवा संस्थेच्या विश्वस्त मंडळाचे अध्यक्ष मधुकर पाठक, व्यवस्थापन मंडळाचे चेअरमन सदानंद देशपांडे यांच्या मार्गदर्शनाखाली झालेल्या या कार्यक्रमाच्या यशस्वितेसाठी कार्यालयीन अधीक्षक सतीश खुडे, विष्णू कुदळे, विजय कुंभार, सुनील वाघमोडे, सतीश परभाने आदींनी विशेष परिश्रम घेतले.
