चतु:शृंगी मंदिरात गुरुवारपासून शारदीय नवरात्रौत्सवाला प्रारंभ

मंदिर प्रशासनाची सर्व तयारी पूर्ण

ऑनलाइन दर्शनाची सुविधा

कोरोनाच्या पार्श्वभूमीवर उपाययोजना

या वर्षी व्हीआयपी दर्शन व्यवस्था नाही

पुणे, ता. ३ : चतु:शृंगी देवीच्या मंदिरात घटस्थापनेला येत्या गुरुवारपासून (७ ऑक्‍टोबर) ते विजयादशमी (१५ ऑक्‍टोबर) शारदीय नवरात्रौत्सवाचे आयोजन करण्यात आले असल्याची माहिती अध्यक्ष नीतीन अनगळ आणि कार्यकारी विश्वस्त श्रीधर अनगळ यांनी प्रसिद्धीपत्रकाद्वारे क्‍ळविली आहे.

गुरुवारी सकाळी आठ वाजता अभिषेक, रुद्राभिषेक, महापूजा, महावस्त्र अर्पण करण्यात येणार आहेत. सकाळी साडेनऊ वाजता घटस्थापना करण्यात येणार असून, दररोज सकाळी दहा आणि रात्री आठ वाजता महाआरती करण्यात येणार आहे. मंदिर सकाळी पाच ते रात्री नऊ या वेळेत भाविकांना दर्शनासाठी खुले राहणार आहे. दिलीप अनगळ या वर्षीचे मंदिर व्यवस्थापक असून, नारायण कानडे गुरुजी पौरोहित्य करणार आहेत.

गुरुवार दिनांक १४ ऑक्टोबर रोजी संध्याकाळी सहा वाजता नवचंडीचा होम करण्यात येणार असून, शुक्रवारी १५ ऑक्टोबर रोजी विजयादशमीनिमित्त संध्याकाळी पाच वाजता मंदिर परिसरात विश्वस्त आणि सेवकांच्या उपस्थितीत साध्या पद्धतीने सीमोल्लंघनाची मिरवणूक काढण्यात येणार आहे.

राज्य सरकारने ७ ऑक्टोबरपासून राज्यातील धार्मिक स्थळे खुली करण्याचा निर्णय जाहीर केला आहे. या संदर्भातील सर्व नियमांचे तंतोतंत पालन करण्यात येणार आहे. कोरोना विषाणूचा प्रादुर्भाव टाळण्यासाठी सर्व विश्वस्त आणि कर्मचार्यांचे लसीकरण पूर्ण करण्यात आले आहे. मंदिराच्या परिसरात मुखपट्टीचा वापर बंधनकारक करण्यात आला असून. प्रवेशद्वारावर सॅनिटायझर, ताप मोजण्याची सोय करण्यात आली आहे.

सोशल डिस्टनसिंगचे पालन व्हावे यासाठी दर्शन रांगेत भाविकांना उभे राहाण्यासाठी रंगांनी खुणा करण्यात आल्या आहेत. महिला आणि पुरुषांच्या स्वतंत्र रांगा असणार आहेत. कुटुंबियांना एकत्र पुरुषांच्या रांगेत प्रवेश मिळू शकेल. या वर्षी अतिमहत्त्वाच्या व्यक्तिंसाठी (व्हीआयपी) स्वतंत्र रांग किंवा प्रवेशाची व्यवस्था करण्यात आलेली नाही. शासनाच्या वतीने वेळोवेळी जाहीर केलेल्या नियमावलीचे पालन करण्यात येर्इल.

भाविकांना देवीचे ऑनलाइन दर्शन घेता यावे यासाठी देवस्थानच्या वतीने विशेष सोय करण्यात आलेली आहे. भाविकांना chatturshringidevasthanpune.org या संकेतस्थळावर ऑनलाइन दर्शन घेता येर्इल किंवा फेसबुक पेज https://www.facebook.com/ChatturshringiDevasthan वर किंवा यूट्यूब https;//shortly.cc/Vqcvk या समाज माध्यमांवर दर्शनाची व्यवस्था करण्यात आलेली आहे. भाविकांना देणगी देण्यासाठी jirnodhar@upi या अपचा उपयोग करता येर्इल.

सुरक्षिततेची उपाययोजना म्हणून भाविकांचा मंदिर परिसरात यात्रेसह दोन कोटी रुपयांचा विमा काढण्यात आला आहे. पोलीय यंत्रणा, खासगी सुरक्षा रक्षक, मंदिरात बंदुकधारी सुरक्षा रक्षक यांची व्यवस्था करण्यात आलेली आहे. परिसरात २१ सीसीटीव्हींची यंत्रणा कार्यान्वित करण्यात आली आहे. आपत्कालिन व्यवस्थापन आणि उपचारांसाठी डॉक्टरांचे पथक आणि रुग्णवाहिका तैनात करण्यात आली आहे.

मंदिर आणि परिसराची रंगरंगोटी, विद्युत रोषणार्इ, पिण्याच्या पाण्याची व्यवस्था, स्तनपानासाठी दोन हिरकणी कक्ष, किटकनाशकांची फवारणी, कचरा संकलन, स्वच्छता, शासकीय अभियांत्रिकी महाविद्यालयाच्या मैदानावर विनामूल्य वाहनतळ व्यवस्था, अग्निशमन दलाची गाडी, गर्दीवर नियंत्रण आणण्यासाठी बॅरिकेटस आदी व्यवस्था पूर्ण करण्यात आल्या आहेत.

मंदिराच्या जीर्णोद्धारासाठी आवश्यक असणार्या परवानग्या महापालिकेच्या बांधकाम विभागाकडून लवकरच मिळणे अपेक्षित असून, नवीन वर्षांत जीर्णोद्धाराचे काम सुरू करण्यात येणार आहे. यात सरकत्या जीन्याची सोय असणार आहे. त्यामुळे वृद्ध आणि अपंगांना देवीचे दर्शन घेणे सोयीचे होणार आहे.

कोरोनाच्या काळात सामाजिक बांधिलकी म्हणून देवस्थानच्या वतीने रत्ना मेमोरियल हॉस्पिटलमध्ये कोरोना रुग्‌णांवर उपचार करण्यासाठी पाच लाख रुपयांची देणगी देण्यात आली.