पुणे-पुणे शहरातील सुमारे २७० जागांवरील सुमारे १२३ एकर क्षेत्र असलेल्या अमिनिटी स्पेस (सुविधा क्षेत्र)खाजगी वापरासाठी दीर्घ मुदतीच्या काळासाठी भाडयाने देण्याचा भाजपने रचलेला डाव हा पुणेकरांच्या हिताविरूध्द असून या सर्व जागांवर वाहनतळ उभे करून पुणेकरांची पार्किंगची सोय करावी असे आवाहन काँग्रेस पक्षनेते आबा बागूल यांनी केले.
यावर आबा बागूल म्हणाले की, भाजप महापालिकेत सत्तेत येण्यापूर्वी पर्यंत सर्व सत्ताधारी पक्षाच्या सदस्यांनी अमेनिटी स्पेस पुणेकरांच्या हितासाठी राखून ठेवल्या होत्या. भाजपने मात्र गेल्या ५ वर्षात कोणताही मोठा विकास प्रकल्प पुणे शहरास दिलेला नसून उलट स्पेस देखील विशिष्ट हित संबंधातील लोकांना देण्याचा घाट घातला आहे.
वास्तविक या अमेनिटी स्पेस पोटी एफ.एस.आय देण्यात आलेला असून आता कोणत्याही प्रकारचे पक्के बांधकाम त्यावरील एफ.एस.आय. वापरला गेल्याने तेथे करता येणार नाही. अशा परिस्थितीत कोणता कायदा व नियमावली अंतर्गत ही अमेनिटी स्पेसची जागा देण्याचा निर्णय घेतला जात आहे याचा खुलासा आयुक्त यांनी तातडीने करावा अशी मागणी देखील आबा बागूल यांनी केली.
आबा बागूल म्हणाले की, सध्या पुण्याच्या विविध नागरी प्रश्नांपैकी रस्ते वाहतूक व पार्किंग हे जीवघेणे प्रश्न बनले आहेत. रस्त्यावरील अमर्याद पार्किंग वाढत असून रस्ते हे पार्किंगसाठी नाहीत असे उच्च न्यायालयाने देखील फटकारले आहे. अशा वेळी या १८५ अमेनिटी स्पेस वाहनतळ म्हणून वापरल्यास तेथे पक्के बांधकाम होणार नाही व पुणेकरांची वाहनतळाची फार मोठी सोय संपूर्ण शहरभर होईल. हे वाहनतळ ३ वर्षाच्या ठेका पध्दतीने दिल्यास त्यातून चांगले उत्पन्न देखील महापालिकेस कायमस्वरूपी मिळेल. सदर अमेनिटी स्पेसेस दिर्घ मुदतीच्या काळासाठी (३० वर्षे ते ९० वर्षे) भाडयाने देणे म्हणजेच विकून जेवढे उत्पन्न मिळणार आहे, त्याहून जास्त उत्पन्न वाहनतळाच्या माध्यमातून वाढेल व कायदयाचे उल्लघंनही होणार नाही.
कोरोना संकट काळात ऑक्सिजनचे महत्व सर्वांच्याच लक्षात आले, असे असताना आबा बागूल म्हणाले की, या अमेनिटी स्पेसवर वाहनतळ निर्माण करून तेथे कडुलिंब व पिंपळ झाडे लावली तर फार मोठा फायदा होणार आहे. या सर्व अमेनिटी स्पेसवर सुमारे एक लाख कडुलिंब व पिंपळ झाडे लावल्यास हवेतील ऑक्सिजनचे प्रमाण संपूर्ण शहरात वाढेल. एक कडुलिंब व पिंपळ या झाडांच्या माध्यमातून २७ पेक्षा जास्त व्यक्तींची ऑक्सिजनची गरज भागवते असे मानले जाते. हे लक्षात घेता अमेनिटी स्पेस धनदांडग्यांना न देता तेथे वाहनतळच उभारले जावेत व त्याचे ठेके देवून कायमस्वरूपी उत्पन्न वाढवावे. या जागेवर कडुलिंब व पिंपळ झाडे ऑक्सिजन वृध्दीसाठी लावावीत यातच पुणेकरांचे हित आहे.
मूठभरांच्या आर्थिक फायदयासाठी पुणेकरांच्या हिताला तिलांजली देवू नका व बहुमताच्या जोरावर हे धोरण राबवू नका. अमेनिटी स्पेसचा वापरलेला एफ.एस.आय मुळे सदर अमेनिटी स्पेसची जागा नॉन बिल्डेबल झालेली असून सदर अमेनिटी स्पेस बिल्डेबल करण्याचा प्रयत्न चुकीचा असून कायदेशीरित्या होवू न शकणारा प्रकार थांबवा व अमेनिटी स्पेस दीर्घ मुदतीच्या काळाने देवू नका. त्याठिकाणी वाहनतळ करा व पुणेकरांचा प्रश्न सोडवा. अन्यथा सदरच्या बेकायेदशीर विषयाचा पाठपुरावा केल्याशिवाय काँग्रेस पक्ष स्वस्थ बसणार नाही, असा इशारा काँग्रेस गटनेते आबा बागूल यांनी सत्ताधारी यांना दिला.
असे निर्णय घेताना पुणे शहरातील स्वयंसेवी संस्था, सामाजिक संस्था, अनुभवी आर्किटेक्ट, तज्ञ मंडळी तसेच पुणे महानगरपालिकेतील सर्व पक्षाचे लोकप्रतिनिधी यांचेशी चर्चा करणे क्रमप्राप्त असताना यांचेशी चर्चा करणे हे सत्ताधारी भाजप व प्रशासनाला का गरजेचे वाटले नाही असा सवाल शेवटी करून आता अंधारात गपचूप जनहित विरोधी धोरणे राबविण्याचा उदयोग भाजपने थांबवावा. पुणेकर सूज्ञ आहेत, ते अशा चुकीच्या पायंडयास कधीच पाठिंबा देणार नाहीत असे ते म्हणाले.
