पुणे- भाजपचे नेते रावसाहेब दानवे यांच्यानंतर प्रदेशाध्यक्ष बदलल्यानंतर आता, पुणे शहर भाजप च्या नव्या शहराध्यक्षांची घोषणा कदाचित आज होण्याची शक्यता वर्तविली जाते आहे. हेडमास्तर म्हणून कडक शिस्तीचे असा लौकिक मिळविल्यानंतर विद्यमान अध्यक्ष योगेश गोगावले यांची वर्णी विधानसभा उमेदवार म्हणून लावली जाण्याची शक्यता त्यामुळे अधिक दाट होत चालली आहे . पर्वती च्या आमदार माधुरी मिसाळ आणि कोथरूड चे भावी आमदार म्हणून ज्यांचा जयघोष सुरु आहे त्या स्थायी समिती च्या माजी अध्यक्ष असलेल्या मुरलीधर मोहोळ या दोघांपैकी एकाची भाजप पुणे शहर अध्यक्ष पदी वर्णी लागण्याची चिन्हे आहेत .तसे झाले तर त्यांची विधानसभेच्या रेस मधून माघार होईल असेही दिसते आहे .मिसाळ यांची वर्णी लागली तर पर्वती विधानसभा मतदार संघ महापालिकेत सभागृह नेते असलेले श्रीनाथ भिमाले यांच्या वाट्याला जाण्याची शक्यता आहे. मात्र मोहोळ यांची वर्णी लागली तर आठ हि मतदार संघात विद्यामानांच्या इच्छुकतेला दाद देत नेत्यांना निर्णय घ्यावा लागणार आहे . प्रदेशाध्यक्ष चंद्रकांत दादा पाटील हे नव्या शहराध्यक्षपदी कोणाची निवड करतील ? असा प्रश्न असला तरी ते सर्वस्वी स्थानिक खासदार गिरीश बापट यांच्या नजरेतूनच निवड करतील असे सांगितले जात आहे .
महापालिकेची पुढील अडीच वर्षे व्यवस्थितपणे पक्षाला सांभाळायची आहेत आणि कदाचित योगेश गोगावले यांना विधानसभा निवडणुकीसाठी उमेदवारी द्यायची आहे असे बोलले जाते आहे. हि त्यांच्या सारख्या जुन्या जाणत्या ज्येष्ठासाठी बढती ठरेल असे बोलले जात असले तरी गोगावले यांच्या पदरी नेमका कोणता मतदार संघ येवू शकेल हा हि प्रश्न उपस्थित होतो आहे .
