पुणे-पाच वर्षांपूर्वी राज्यातील सर्व पैसा उचलून स्वत:ची घरे भरणाऱ्या नेत्यांमुळे महाराष्ट्राची ओळख भ्रष्टाचारी राज्य म्हणून झाली होती. राज्यात भारतीय जनता पक्षाचे सरकार सत्तेत आल्यानंतर मुख्यमंत्री देवेंद्र फडणवीस यांनी हे चित्र बदलले’, असे प्रशस्तिपत्र भाजपचे कार्याध्यक्ष जे. पी. नड्डा यांनी सोमवारी दिले. राज्याला प्रगतिपथावर पुढे नेण्यासाठी येणाऱ्या निवडणुकीतही पुन्हा भाजपलाच विजयी करण्याची संधी दवडू नका,’ असा सल्ला त्यांनी कार्यकर्त्यांना दिला.
भाजपतर्फे पश्चिम महाराष्ट्रातील पदाधिकारी-कार्यकर्त्यांच्या विजय संकल्प मेळाव्यात कार्यकर्त्यांना मार्गदर्शन करताना ते बोलत होते. आगामी निवडणुकीची रणनीती स्पष्ट करताना कलम ३७० सह केंद्र सरकारने घेतलेले निर्णय आणि राज्यातील फडणवीस सरकारच्या योजनांची माहिती प्रत्येक घराघरांत पोहोचवा, अशा सूचना त्यांनी कार्यकर्त्यांना केल्या. कार्यकर्त्यांच्या बळावर आगामी निवडणुकीत पक्षाला अधिक चांगले यश मिळेल, अशी अपेक्षा त्यांनी व्यक्त केली. शिक्षण आणि आरोग्यातील पिछाडी राज्याने भरून काढली असून शेतकऱ्यांना कर्जमाफी, सिंचन प्रकल्प, रस्ते विकास, पायाभूत सुविधा, मेट्रो अशा अनेक विकास प्रकल्पांना राज्याचा चेहरामोहरा बदलण्याचे काम वेगाने सुरू आहे, असे निरीक्षण त्यांनी नोंदविले.
जम्मू-काश्मीरमधील कलम ३७०, तिहेरी तलाक, कॉर्पोरेट करातील सवलत यासारख्या अनेक निर्णयांमुळे नागरिकांना फायदा होत आहे. त्याची माहिती मतदारांपर्यंत पोहोचवा, असेही त्यांनी स्पष्ट केले. ‘देशातील बहुतांश राजकीय पक्ष हे एखाद्या कुटुंबाशी संबंधित आहेत. त्यांचे राजकारण कुटुंबातील ठरावीक व्यक्तींभोवतीच फिरते; पण भाजपमध्ये ही स्थिती नाही. त्यामुळे कोणतीही राजकीय पार्श्वभूमी नसतानाही मोदींसारखा सामान्य कार्यकर्ता पंतप्रधान होऊ शकतो’, असे नमूद करत कार्यकर्ता हीच भाजपची ताकद असल्याचे त्यांनी सांगितले.
या मेळाव्याला पक्षाचे सरचिटणीस आणि प्रदेश संघटनमंत्री व्ही. सतीश, पुण्याचे खासदार गिरीश बापट, महापौर मुक्ता टिळक, शहराध्यक्षा माधुरी मिसाळ यांच्यासह पश्चिम महाराष्ट्रातील खासदार, आमदार आणि पदाधिकारी मोठ्या संख्येने उपस्थित होते.
