राज्यपालांकडून राज्य विधिमंडळाचे अधिवेशन बोलवण्यात आले असून त्यात विधानसभा अध्यक्षाची निवडणूक होणार आहे. यासाठी भाजपने आज राहुल नार्वेकर यांच्या नावाला पसंती दिली असून त्यांचा उमेदवारी अर्ज दाखल होणार आहे. यापूर्वी, राधाकृष्ण विखे पाटील यांचे नाव विधानसभा अध्यपदासाठी आघाडीवर होते. त्या पार्श्वभूमीवर भाजप आमदारांची आज संध्याकाळी बैठकदेखील झाली. या बैठकीत विधानसभा अध्यक्ष पदाचे उमेदवार म्हणून राहुल नार्वेकर यांच्या नावावर शिक्कामोर्तब करण्यात आले.नाना पटोले यांनी राजीनामा दिल्यानंतर विधानसभा अध्यक्षपद रिक्त झाले होते. तेव्हापासून उपाध्यक्ष नरहरी झिरवाळच अध्यक्षपदाची जबाबदारी पार पाडत होते. मात्र, अध्यक्षपदाच्या निवडणुकीत अनेक राजकीय अडथळे येत असल्याचे चित्र निर्माण झाले होते. उद्धव ठाकरे सरकारने अध्यक्षपदाची निवडणूक घेण्याची परवानगी देण्यासाठी राज्यपालांना विनंती करून देखील ही परवानगी देण्यात आली नव्हती. या पार्श्वभूमीवर आता नवे सरकार अस्तित्वात आल्यानंतर दुसऱ्याच दिवशी सूत्र वेगाने हलू लागली असून तातडीने बोलावण्यात आलेल्या अधिवेशनातच ही निवडणूक घेण्याचा कार्यक्रम जाहीर करण्यात आला आहे.
शिवसेनेच्या आमदारांनी बंड केल्यानंतर राज्यात सत्तापालट झाले आहे. एकनाथ शिंदे हे राज्याचे नवे मुख्यमंत्री तर देवेंद्र फडणवीस हे उपमुख्यमंत्री झाले आहेत. अशातच दोन्हींकडून म्हणजेच शिंदे गटातून आणि भाजपकडूनदेखील विधानसभा अध्यपदासाठी चाचपणी सुरू होती. सुरुवातीला राधाकृष्ण विखे पाटील यांचे नाव आघाडीवर होते. राधाकृष्ण पाटील हे ज्येष्ठ नेते असून ते देवेंद्र फडणवीस यांच्या अतिशय जवळचे मानले जातात. काँग्रेसमधून राजीनामा दिल्यानंतर त्यांनी भाजपमध्ये प्रवेश केला आहे, त्यामुळे सर्वपक्षीय त्यांचे संबंध चांगले आहेत. त्याचबरोबर विधिमंडळ कामकाजाचादेखील त्यांना चांगला अनुभव असल्याने विखे यांचे नाव आघाडीवर होते.
विधानसभा अध्यपदासाठी तीन ते चार नाव चर्चेत होती. तथापि, बैठकीनंतर राहुल नार्वेकर यांचे नाव समोर आले. भाजपच्या सर्व आमदारांना दुपारी दोन वाजता महाराष्ट्र प्रदेश कार्यालयात उपस्थित राहण्याचे सांगण्यात आले होते. भाजप कार्यालयात आज जल्लोषाच्या कार्यक्रमाचे आयोजन करण्यात आला. भारतीय जनता पक्षाते प्रदेशाध्यक्ष चंद्रकांत पाटील इतर नेत्यांसह उपस्थित होते. परंतु देवेंद्र फडणवीसांच्या गैरहजेरीमुळे ते नाराज असल्याची चर्चा रंगू लागली. मुंबईतील दादर नायगाव मतदार संघाचे आमदार कालिदास कोळंबकर यांचेही नाव विधानसभा अध्यक्षपदासाठी चर्चेत होते.
