पुणे, दि. 31:- जिल्ह्यातील पाटबंधारे विभागाच्या विविध प्रकल्पांमुळे बाधित झालेल्या सर्व पात्र प्रकल्पग्रस्तांचे पुनर्वसन करण्यासाठी राखीव असलेल्या जमिनींचा भूसंचय तयार करण्याचे काम सद्यस्थितीत सुरू असून प्रकल्पग्रस्तांना भूसंचयामध्ये उपलब्ध जमीनीचा तपशील अभ्यासून पर्यायी जमीन मिळण्यासाठी अर्ज करण्याचे आवाहन करण्यात आले आहे.
सर्व पात्र प्रकल्पग्रस्तांनी www.pune.gov.in या संकेतस्थळाला किंवा उपजिल्हाधिकारी (पुनर्वसन) पुणे या कार्यालयाला भेट देवून भूसंचयामध्ये उपलब्ध जमिनीचा तपशीलवार माहिती घ्यावी. भूसंचयातील ज्या जमिनीसाठी सहा महिन्यांत पसंती प्राप्त न झाल्यास अशा जमिनी भूसंचयामधून वगळण्याची कार्यवाही करण्यात येणार आहेत.
सदरील भूसंचय वेळोवेळी अद्ययावत करण्यात येणार आहे. जिल्ह्यातील संबंधित प्रकल्पाच्या लाभक्षेत्रातील पुनर्वसनासाठी संपादित करण्यात आलेल्या जमिनी प्रपत्र-अ, जिल्हाधिकारी तथा उपसंचालक पुनर्वसन (जमीन) पुणे यांचे नावे असलेल्या शासकीय जमिनी प्रपत्र-ब व संपादित न केलेल्या परंतु सातबाराच्या इतर हक्कात पुनर्वसनाचा शेरा असलेल्या जमिनी प्रपत्र-क, अशा तीन प्रकारच्या जमिनींच्या अनुषंगाने सद्यस्थितीत प्राप्त माहितीनुसार तयार करण्यात आलेल्या भूसंचयाबाबतची माहिती जिल्हाधिकारी पुणे यांच्या www.pune.gov.in या संकेतस्थळावर उपलब्ध करण्यात आली आहे. भूसंचयानाबाबतची माहिती उपजिल्हाधिकारी (पुनर्वसन), जिल्हाधिकारी कार्यालय, पुणे येथे पाहण्यासाठी उपलब्ध करून देण्यात आली आहे , असे पुनर्वसन शाखेचे उपजिल्हाधिकारी उत्तम पाटील यांनी कळविले आहे.
