पुणे- कोरोनाचा सामना करणाऱ्या शहर पोलिस दलाच्या मदतीसाठी केंद्रीय सशस्त्र पोलिस दलाची १२० जवानांची एक तुकडी पुणे शहरात दाखल होणार आहे.असे वृत्त मान्यवर वृत्त संस्थानी दिले आहे.
या वृत्तात असे म्हटले आहे की,राज्यात कोरोनामुळे पोलिस दल अहोरात्र कार्यरत आहे. त्यामुळे त्यांच्यावर अतिरिक्त कामाचा भार पडत आहे. याखेरीज रमजान व येणारा ईद सण तसेच कायदा व सुव्यवस्था राखण्यासाठी राज्य पोलिस दलाच्या मदतीसाठी केंद्राकडे केंद्रीय सशस्त्र पोलिस दलाच्या (CAPF) वीस पथकांची मागणी करण्यात आली आहे, अशी माहिती गृहमंत्री अनिल देशमुख यांनी दिली.
राज्यात राज्य राखीव पोलिस दलाच्या ३२ पथके कार्यरत आहेत. त्यांच्या मदतीने पोलिस दल कार्य करत आहे. मात्र, पोलिस दलातील अधिकारी, कर्मचारी यांनादेखील कोरोनाची बाधा झालेली आहे. पोलिसांना विश्रांतीची गरज आहे. त्यामुळे राज्यात तातडीने केंद्रीय सशस्त्र पोलिस दलाची २० पथके मिळावीत, अशी मागणी केली आहे.
पोलिसांच्या मदतीसाठी गृहमंत्री अनिल देशमुख यांनी केंद्रीय सशस्त्र दलाच्या २० तुकड्यांची मागणी केंद्राकडे केली आहे. त्या तुकड्या राज्यात दाखल झाल्यानंतर मुंबईसह राज्यातील विविध शहरांमध्ये तैनात करण्यात येणार आहेत. पोलिसांच्या मदतीसाठी केंद्रीय सशस्त्र दलाच्या १२० जवानांची तुकडी पुणे शहराला मिळणार आहे. शहरात ६९ ठिकाणी प्रतिबंधित क्षेत्र जाहीर करण्यात आले आहेत. या ठिकाणी पुणे पोलिसांना ही तुकडी बंदोबस्तासाठी सहाय्य करेल, अशी माहिती विशेष शाखेचे पोलिस उपायुक्त मितेश घट्टे यांनी दिली.
कोरोनाचा प्रादुर्भाव रोखण्यासाठी लागू असलेल्या लॉकडाऊन काळात पोलिस दल मोठ्या प्रमाणावर बंदोबस्तात अडकलेले आहे़. तर राज्यात सुमारे एक हजार पोलिस अधिकारी व कर्मचाऱ्यांना कोरोना विषाणुची लागण झाली आहे़. त्यामुळे मोठ्या संख्येने पोलिसांना क्वारंटाईन करावे लागले आहे. तसेच ५५ वर्षांवरील पोलिस कर्मचाऱ्यांना खबरदारी म्हणून रजा देण्यात आली आहे़. त्यामुळे उरलेल्या पोलिस दलावर बंदोबस्ताचा मोठा ताण आला आहे.
