पुणे- चल म्हटली कि निघाली … हे गिरीश बापटांचे वक्तव्य आता कुठे विस्मरणात जाते ना जाते तोच कार्ट्यां बिनधास्तपणे सिगारेट ओढतात असे वक्तव्य आज माजी उपमुख्यमंत्री आणि राष्ट्रवादी चे नेते अजित पवार यांनी केले आहे .
आधुनिक काळात कार्ट्यांचे (मुली) व्यसनाचे प्रमाण वाढले आहे. विशेषतः शहरातील कार्ट्या बिनधास्तपणे सिगारेट ओढतात. ठराविक वयात आणि चुकीच्या मित्र परिवारामुळे दिवसेंदिवस मुलींमधील व्यसनाधिनता वाढली आहे. असे वक्तव्य राष्ट्रवादीचे नेते अजित पवार यांनी केले आहे. जिल्हा परिषदेच्यावतीने आयोजित स्वर्गीय आर. आर. पाटील कॅन्सर साक्षर व कॅन्सरमुक्ती अभियानात ते बोलत होते.
जीवनशैली बदलल्यामुळे अनेकांकडून चक्क आनंदात, दुःखात, विजयात आणि मूड नसताना दारु घेतली जाते. ग्रामीण भागात पोलिसांना सापडणार नाही, असे दारुचे गुत्ते दारूड्यांना लगेच आढळून येतात.
तंबाखू, दारू, सिगारेटमुळे कॅन्सरचे रुग्ण वाढत असल्याचे पवारांनी सांगितले. देशात सर्वाधिक कॅन्सर रुग्ण असलेल्या यादीत महाराष्ट्र राज्याचा क्रमांक सर्वात आधी लागतो काय, अशी भीती पवारांनी व्यक्त केली. पुर्नजन्म सारख्या गोष्टी अंधश्रद्धा असल्याचे सांगत जन्माला आल्यानंतर चांगले काम केले पाहिजे. नाहीतर निरोगी शरीर व्यसनामुळे वाया जाईल, असे ते म्हणाले. विशेषत दारू पिणाऱ्या मुलींबाबत त्यांनी काळजी व्यक्त केली.
