देशभरातील १४ राज्यांमध्ये कार्यान्वित
मुंबई : सूक्ष्म कर्जाच्या व्यवसायासाठी एलएनटी फायनान्सने (एलटीएफ) पश्चिम बंगालमधील कोलकाता येथे १०००व्या मीटिंग सेंटर सुरू केले आहे. एलटीएफ ही भारतातील आघाडीची नॉन-बँकिंग वित्तीय सेवा कंपनी (एनबीएफसी) असलेल्या एलएनटी फायनान्स होल्डिंगची (एलटीएफएच) उपकंपनी आहे. एलटीएफने गेल्या दोन महिन्यांत पश्चिम बंगालमध्ये १४ नवी मीटिंग सेंटर्स सुरू केली आहेत. त्यामुळे या राज्यात एलटीएफच्या सेंटर्सची संख्या १२६वर पोहोचली आहे.
याशिवाय, कंपनीने एक अॅपचे अनावरण केले असून याद्वारे ग्राहकांना सहजपणे तात्काळ कर्ज मंजूर करून देण्यात येणार आहे. कर्ज मंजुरी, गट स्थापना, ई-स्वाक्षरी, पावती देणे, रिस्क ऑडिट यासारख्या विविध प्रकारच्या सेवा ग्राहकांना सुलभरीत्या देण्यासाठी सूक्ष्म कर्ज व्यवसाय डिजिटल करण्यात आला आहे.
३१ मार्च २०१८ला संपलेल्या वित्तीय वर्षात एलटीएफकडे ७.५४९ कोटी रुपयांच्या सूक्ष्म कर्जांची मागणी झाली. त्यात ५७,५०० गावांतील सुमारे ३८.२ लाख महिलांचा समावेश आहे. देशाच्या इतर भागातही जलदगतीने सूक्ष्म कर्ज व्यवसायाचा विस्तार करण्यास एलटीएफने सुरुवात केली असून २०१८ या आर्थिक वर्षात एलटीएफने तीन राज्यांत कामकाजास सुरुवात केली आहे. २०१८ या अर्थिक वर्षात एलटीएफने एकूण ७२१४ कोटी रुपयांच्या कर्जांचे वाटप केले असून यापैकी सुमारे ३० टक्के व्यवसाय हा या कालावधित सुरु केलेल्या नव्या मीटिंग सेंटरच्या माध्यमातून मिळाला आहे. उत्पन्न मिळवून देणाऱ्या साधनाची उभारणी करण्यासाठी महिला उद्योजकांना एलटीएफ पाठबळ देते. कंपनी दर महिन्याला साधारणपणे ३ लाख ग्राहकांना अशी संधी उपलब्ध करून देते.
मीटिंग सेंटरच्या उद्घाटनप्रसंगी मुख्य कार्यकारी अधिकारी ग्रामीण वित्तपुरवठा आणि मुख्य मनुष्यबळ अधिकारी श्री. सुनील प्रभुणे म्हणाले की, `१०००व्या मीटिंग केंद्राचे उद्घाटन म्हणजे आमच्यासाठी अतिशय महत्त्वाचा टप्पा आहे. बँकेपासून अद्याप दूर असलेल्या ग्राहकांपर्यंत पोहचण्याचे आमचे धोरण असून त्याचदृष्टीने आम्ही नव्या-नव्या भागात सातत्याने स्वत:चे अस्तित्त्व निर्माण करीत आहोत.`
श्री. प्रभुणे पुढे म्हणाले की, `ग्राहकांना सुखद अनुभव देण्याबरोबरच डिजिटल सेवा आणखी सक्षम करण्याची भूमिका हे नवे अॅप सुरू करण्यामागे आहे. ग्रामीण भागातील लोकांना शाश्वत असे उपजीविकेचे साधन उपलब्ध करून देण्यासाठी आम्ही सतत नवीन-नवीन उपाययोजना पुरवितो.`
तामिळनाडू, पश्चिम बंगाल, ओडिशा, महाराष्ट्र, कर्नाटक, केरळ, मध्य प्रदेश, उत्तर प्रदेश, गुजरात, आसाम, बिहार, छत्तीसगढ, त्रिपुरा आणि झारखंड या १४ राज्यांमध्ये एलटीएफची मीटिंग सेंटर्स आहेत. तंत्रज्ञानाचा प्रभावी वापर, विश्लेषणावर आधारित व्यवसायनिर्मिती आणि मजबूत असे रिस्क गव्हर्नन्स फ्रेमवर्क याच्या जोरावर कंपनी भारतातील आघाडीची सूक्ष्म कर्ज पुरवणारी कंपनी बनली आहे.
एलएनटी फायनान्स होल्डिंग्स लिमिटेड (एलटीएफएच) कंपनीची माहिती –
एलटीएफएच ही नॉन-बँकिंग फायनान्शियल सर्व्हिसेस होल्डिंग कंपनी आहे. एलएनटी फायनान्स लिमिटेड (आधीची फॅमिली क्रेडिट लि.), एलएनटी हाऊसिंग फायनान्स लि., एलएनटी इन्फ्रास्टचर फायनान्स कंपनी, लि., एलएनटी इन्व्हेस्टमेन्ट मॅनेजमेन्ट लि. आणि एलएनटी कॅपिटल मार्केट्स लि. या उपकंपन्यांच्या माध्यमातून ही कंपनी ग्रामीण, गृह तसेच घाऊक वित्तपुरवठा क्षेत्रांमध्ये अनेक प्रकारची वित्तीय उत्पादने आणि सेवा तसेच म्युच्युअल फंड उत्पादने आणि मालमत्ता व्यवस्थापन सेवा पुरविते. CIC-ND-SI म्हणून एटीएफएचची आरबीआयकडे नोंदणी आहे. अभियांत्रिकी, बांधकाम, इलेक्ट्रिकल आणि इलेक्ट्रॉनिक्स उत्पादने आणि सेवा तसेच आयटी आणि वित्तीय सेवा आदींमध्ये भारताच्या आघाडीच्या कंपन्यांमध्ये गणली जाणाऱ्या लार्सन अॅण्ड टुर्बो (एलएनटी) ही एलटीएफएचची प्रवर्तक आहे.
