पुणे-पथारी व्यावसायिकांवर होत असलेली कारवाई ही दंडेलशाही प्रकारात बसणारी असून नागरिकांच्या पोट भरण्यासाठी व्यवसाय करण्याच्या मुलभूत हक्कावर गदा आणणारी आहे असा आरोप कॉंग्रेसचे ज्येष्ठ नगरसेवक, माजी उपमहापौर आबा बागुल यांनी केल आहे , त्याच बरोबर शहरातील पथारी व्यावसायिकांना भाडेपोटी असलेली थकबाकी भरण्यासाठी मिळकतकराच्या धर्तीवर अभय योजना राबवा अशी मागणी त्यांनी महापालिका प्रशासनाकडे केली आहे. शहरातील पथारी व्यावसायिकांना दिलासा मिळण्यासाठी अभय योजनेच्या धर्तीवर योजना तयार करावी तोपर्यंत सद्यस्थितीत सुरू असलेली कारवाई थांबवावी अशी मागणीही आबा बागुल यांनी केली आहे.
या संद्रभात आबा बागुल यांनी म्हटले कि,’ सद्यस्थितीत शहरातील पथारी व्यावसायिकांकडे भाडेपोटी असलेली थकबाकी वसूल करण्यासाठी प्रशासनाकडून जोरदार कारवाई सुरु आहे. थकबाकी तात्काळ भरा ;अन्यथा स्टॉलला सील असा कारवाईचा बडगा प्रशासनाने उगारल्याने शहरातील सुमारे एक लाखाहून अधिक कुटुंबांवर ‘संक्रांत’ आली आहे. परिणामी त्यांच्यावर उपासमारीची वेळ ओढवली आहे. वास्तविक कोरोना काळात .उदरनिर्वाहाचे साधन बंद असल्याने या पथारी व्यावसायिकांचे मोठे हाल झाले. त्यातून स्टॉलचे भाडे त्यांना भरता आले नाही मात्र आता भाडेपोटी थकबाकी आणि त्यावरील व्याज वसूल करण्यासाठी प्रशासनाने पथारी व्यावसायिकांच्या स्टॉलला सील लावण्याची कारवाई सुरु केली आहे,ती अयोग्य आहे. आता कुठे अर्थव्यवस्था पूर्वपदावर येत असताना थकबाकी आणि त्यावर व्याज वसूल करण्यासाठी पथारी व्यावसायिकांवर होत असलेली कारवाई दंडेलशाही या सदरात मोडणारी आहे. वास्तविक मिळकतधारकांकडील कोट्यवधींची थकबाकी वसूल करताना, ज्या पद्धतीने शास्तीमध्ये सवलत दिली जाते. त्याच धर्तीवर पथारी व्यावसायिकांना दिलासा देण्यात यावा यासाठी महानगरपालिकेची अभय योजना या व्यावसायिकांसाठी राबवावी व त्यांना थकीत भाडे हप्त्याने भरण्यासाठी मुदत द्यावी. अशी मागणी काँग्रेस पक्षाचे माजी उपहापौर आबा बागुल यांनी आयुक्तांकडे केली आहे.
