महावितरणचे अधीक्षक अभियंता श्री. राजेंद्र पवार यांची माहिती
पुणे, दि. 18 फेब्रुवारी 2021: प्रामुख्याने कृषीपंपधारकांसह कृषी ग्राहकांना वीजबिलांतून थकबाकीमुक्तीची संधी कृषी धोरण 2020 अंतर्गत उपलब्ध झाली आहे. यासोबतच वसुल झालेल्या एकूण रकमेतील प्रत्येकी 33 टक्के रक्कम ही संबंधीत ग्रामपंचायत व जिल्ह्यातील वीज वितरण यंत्रणेच्या पायाभूत सक्षमीकरणासाठी व विस्तारीकरणासाठी वापरली जाणार आहे अशी माहिती महावितरणचे पुणे ग्रामीण मंडलाचे अधीक्षक अभियंता श्री. राजेंद्र पवार यांनी दिली.
राजुरी (ता. जुन्नर) येथे गुरुवारी (ता. 18) अखिल भारतीय ग्राहक पंचायत व महावितरणच्या वतीने कृषीपंपधारक शेतकरी मेळाव्याचे आयोजन करण्यात आले होते. यात कृषी धोरण 2020 ची सविस्तर माहिती देताना अधीक्षक अभियंता श्री. पवार बोलत होते. यावेळी ग्राहक पंचायतीचे संघटन मंत्री श्री. बाळासाहेब औटी, पंचायत समितीचे माजी सभापती श्री. दीपक आवटे यांची प्रमुख उपस्थिती होती.
राज्य शासनाच्या कृषी धोरण 2020 नुसार कृषीपंपधारक शेतकऱ्यांसह लघु व उच्चदाब कृषीग्राहकांना थकबाकीमुक्त होण्याची संधी उपलब्ध झाली आहे. यामध्ये येत्या वर्षभरात योजनेप्रमाणे सुधारित मूळ थकबाकीची 50 टक्के रक्कम भरल्यास उर्वरित सर्व थकबाकी 100 टक्के माफ होणार आहे. यासोबतच कृषी ग्राहकांनी वीजबिलांपोटी भरलेल्या रकमेपैकी 33 टक्के रक्कम ग्रामपंचायत व 33 टक्के रक्कम जिल्हा क्षेत्रातील वीजयंत्रणेच्या विकास कामांसाठी खर्च करण्यात येणार आहे. यातून नवीन उपकेंद्रासह वीज यंत्रणेचे सक्षमीकरण करण्यात येणार आहे, अशी माहिती श्री. पवार यांनी दिली.
ग्रामपंचायत, महिला बचत गट, साखर कारखाने, शेतकरी सहकारी संस्था यांनी वीज बिल भरणा केंद्रांच्या माध्यमातून योग्य मोबदला दिला जाणार आहे. कृषीपंपधारक शेतकऱ्यांनी थकबाकीमुक्तीसह गावातील व जिल्ह्यातील पायाभूत वीज यंत्रणेच्या विकासाला हातभार लावावा असे आवाहन अधीक्षक अभियंता श्री. पवार यांनी केले. यावेळी श्री. बाळासाहेब औटी यांनी कृषीग्राहकांच्या विविध प्रश्नांकडे लक्ष वेधत मार्गदर्शन केले.
या कार्यक्रमात परिसरातील 5 कृषी ग्राहकांनी प्रातिनिधीक स्वरूपात 1 लाख 93 हजार रुपयांच्या थकबाकीचा भरणा केला. त्यांच्यासह वीजबिलांच्या थकबाकीमुक्तीसाठी प्रयत्न करणारे जनमित्र अमित बनकर यांचा गौरव करण्यात आला. श्री. बनकर यांच्या प्रयत्नातून 44 ग्राहकांनी 14 लाख 57 हजार रु पयांच्या थकबाकीचा भरणा केला आहे. कार्यक्रमाला मंचर विभागाचे कार्यकारी अभियंता श्री. एच. ए. नारखेडे, राजुरीच्या सरपंच प्रिया हाडवळे, उंचखडकच्या सरपंच सुवर्णा कणसे, बोरीच्या सरपंच वैशाली जाधव, उपकार्यकारी अभियंता श्रीकांत लोथे, श्री. सिद्धार्थ सोनोने आदींची उपस्थिती होती. या मेळाव्यात परिसरातील शेतकरी मोठ्या संख्येने उपस्थित होते.
