नागपूर-आर्थिक संकटात सापडलेल्या येस बँकेत राष्ट्रसंत तुकडोजी महाराज नागपूर विद्यापीठाने तब्बल १९१ कोटी रुपये बचत ठेवीत जमा केले असल्याची धक्कादायक माहिती समोर आल्याने सिनेट सदस्यांनी एकच गदारोळ केला. खासगी बँकेत पैसे गुंतवण्याची शिफारस कोणी केली, सरकारच्या अध्यादेशाची पायमल्ली कोणी केली, असे प्त्यारश्चीन उपस्थित करत चौकशी करण्यासाठी सिनेट सदस्यांची समिती स्थापन करण्याचा निर्णय घेतला.
येस बँकेत गुंतवलेला पैसा बुडणार नाही, अशी ग्वाही केंद्रीय अर्थमंत्री निर्मला सीतारमण यांनी दिली असली तरीही त्या बँकेवर आरबीआयने टाकलेल्या प्रतिबंधाचे तीव्र पडसाद सिनेट सभेत उमटले. सिनेट सदस्य अॅड. मोहन वाजपेयी यांनी सभागृहात हा मुद्दा उपस्थित केला. राज्य सरकारच्या अध्यादेशानुसार खासगी बँकेत पैसे गुंतवण्यास विद्यापीठांना मनाई केली असतानाही येस बँकेत १९१ कोटी रुपये कसे जमा केले, असा प्रश्न त्यांनी उपस्थित केला. त्यावर, ‘सिनेटनेच तयार केलेल्या फंड मॅनेजमेंट समितीच्या शिफारशीनुसार हा पैसा तिथे ठेवण्यात आला असावा’, असे कुलगुरू डॉ. सिद्धार्थविनायक यांनी सांगितले. त्यावर समितीचे अध्यक्ष जगदीश जोशी यांनी आक्षेप घेतला. फंड मॅनेजमेंट समिती गेल्यावर्षी स्थापन झाली. त्या समितीला चालू खात्यात पडून असलेल्या ७० कोटींच्या नियोजनाबाबतच काम करायचे होते. समितीने कोणत्याही खासगी बँकेची शिफारस केलेली नाही. तर येस बँकेत त्यापूर्वीच पैसा गुंतवण्यात आला आहे, याकडे त्यांनी लक्ष वेधले.
दरम्यान, येस बँकेत ठेवलेला पैसा आता बुडीत खात्यात आहे. त्यामुळे बजेट मंजूर करीत असताना त्या पैशांबाबत सिनेटला निर्णय घ्यावा लागेल. राष्ट्रीयीकृत बँकेत पैसे जमा करायचे सोडून खासगी बँकांना प्राधान्य देणे दुर्भाग्यपूर्ण आहे, असे प्राचार्य डॉ. बबनराव तायवाडे म्हणाले. तर या प्रकरणाची चौकशी निवृत्त न्यायाधीशामार्फत करावी, अशी मागणीही करण्यात आली. त्या मागणीला मृत्युंजय सिंग यांनीही दुजोरा दिला. तेव्हा कुलगुरूंनी विद्यापीठाची अंतर्गत समिती स्थापन करण्यास मंजुरी दिली. त्यानुसार, सिनेट सदस्य जगदीश जोशी, अॅड. मोहन वाजपेयी, विष्णू चांगदे, संजय धनवटे आणि वित्त अधिकारी राजू हिवसे यांची समिती स्थापन करण्यात आली आहे. येस बँकेत पैसे गुंतवण्याच्या निर्णयाची चौकशी ही समिती करणार आहे.
