पुणे : महावितरणकडे सुरक्षा ठेव म्हणून जमा असलेल्या रकमेवरील व्याजापोटी पुणे परिमंडलातील 21 लाख
63 हजार लघुदाब वीजग्राहकांना नियमानुसार 34 कोटी 47 लाख रुपयांचा परतावा देण्यात आला आहे. गेल्या मे ते
जुलै महिन्यातील वीजदेयकांत ही रक्कम समायोजीत करण्यात आली आहे.
महाराष्ट्र विद्युत नियामक आयोगाच्या निर्देशानुसार सर्व वर्गवारीतील वीजग्राहकांनी महावितरणकडे सुरक्षा ठेव
जमा करणे बंधनकारक आहे. या ठेवीवर कालावधीनुसार 9.5 टक्क्यांपर्यत व्याज देण्याचे महाराष्ट्र विद्युत नियामक
आयोगाचे निर्देश आहेत. त्यानुसार पुणे परिमंडलात आतापर्यंत लघुदाब वर्गवारीमध्ये घरगुती- 18 लाख 49 हजार
ग्राहकांना 22 कोटी 25 लाख रुपये, वाणिज्यिक- 2 लाख 30 हजार ग्राहकांना 6 कोटी 80 लाख रुपये, औद्योगिक-
34,374 वीजग्राहकांना 4 कोटी 6 लाख रुपयांच्या व्याजाचा परतावा वीजदेयकांतून समायोजित करण्यात आला आहे.
या व इतर वर्गवारीतील ग्राहकांसह पुणे परिमंडलातील लघुदाब वर्गवारीत एकूण 21 लाख 63 हजार वीजग्राहकांना
एकूण 34 कोटी 47 लाख रुपयांचे व्याज देयकांत समायोजित करण्यात आले आहे.
सर्व वर्गवारीतील वीजग्राहकांनी महावितरणकडे सुरक्षा ठेव जमा करणे बंधनकारक आहे. आर्थिक वर्षातील एका
महिन्याच्या सरासरी एवढे देयक सुरक्षा ठेव म्हणून जमा करावे लागते. वीजग्राहकांनी मूळ सुरक्षा ठेव याआधी जमा केली
असली तरी वीजदर, वीजवापर आणि पर्यायाने देयकांची रक्कम वाढलेली आहे. त्यामुळे मूळ सुरक्षा ठेव आणि गेल्या
आर्थिक वर्षातील एका महिन्याचे सरासरी वीजदेयक यातील फरकाच्या रकमेचे देयक अतिरिक्त सुरक्षा ठेव म्हणून
ग्राहकांना देण्यात येते. अद्यापही ज्या ग्राहकांनी अतिरिक्त सुरक्षा ठेव भरलेली नाही त्यांनी सुरक्षा ठेव भरावी, असे
आवाहन महावितरणने केले आहे. पुणे परिमंडलातील लघुदाब वीजग्राहकांना अतिरिक्त सुरक्षा ठेवीच्या रकमेची माहिती
तसेच ऑनलाईन पेमेंटची सोय महावितरणच्या अधिकृत www.mahadiscom.in या
संकेतस्थळावर उपलब्ध करून देण्यात आली आहे.
