राष्ट्रवादी काँग्रेसच्या खासदार सुप्रिया सुळे यांनी मणिपूरमधील हिंसाचार आणि महिलांवरील अत्याचाराचा मुद्दा मंगळवारी लोकसभेत उपस्थित केला. मणिपूरला निर्भय महिलांचा वारसा आहे हे आपण विसरता कामा नये. त्यांच्या सोबत उभे राहणे ही आपली जबाबदारी आहे. ‘बेटी बचेगी, तभी तो पढेगी’ हे विसरता कामा नये, असे सुळे यांनी म्हटले आहे. यासंदर्भात त्यांनी फेसबूकवर पोस्ट टाकून माहिती दिली आहे.या पोस्ट मध्ये सुळे यांनी काय म्हटले आहे वाचा त्यांच्याच शब्दात …
लोकसभेत नियम ३७७ अंतर्गत मणिपूर येथे महिलांवर होत असलेल्या अनन्वित अत्याचाराचा मुद्दा उपस्थित केला. देशभरात आरक्षण हा संघर्षाचा विषय झाला आहे. महाराष्ट्रातील स्थानिक स्वराज्य संस्थांच्या रखडलेल्या निवडणुका असो की मणिपूर येथील वांशिक हिंसाचार, यामागे आरक्षणाचाच मुद्दा आहे. मणिपूर येथील हिंसाचारात जून महिन्यात १४२ जणांचा मृत्यू झाल्याचा सरकारी आकडा आहे. जुलै संपत आला तरी हा हिंसाचार थांबवण्याचे नाव घेत नाही. जवळपास ५४ हजार लोक विस्थापित झाले असून अनेकांची घरे उद्ध्वस्त करण्यात आली आहेत. येथील परिस्थिती अतिशय गंभीर आहे. देशाचा जगभरात गौरव वाढविणारी बॉक्सर मेरी कॉमच्या राज्यात महिलांप्रती झालेला हिंसाचार अतिशय गंभीर बाब आहे. महिलांना सरेआम गोळ्या मारल्या जात आहेत. त्यांच्यावर बलात्कार होत आहेत. महिलांची विवस्त्र धिंड काढल्याचा एक व्हिडिओ समाजमाध्यमांत व्हायरल झाल्यानंतर मणिपूर येथील हिंसाचाराबाबत सरकारला तातडीने कारवाई करावी लागली. सरकारने देखील हा व्हिडिओ जास्त पसरु नये यासाठी प्रयत्न केले. तपास यंत्रणांना देखील गुन्हे दाखल करुन आरोपींना गजाआड करण्यासाठी ७७ दिवस लागले. हा संघर्ष सोडविण्यासाठी केंद्र सरकारने नेमके काय प्रयत्न केले याबाबत स्पष्टीकरण देण्याची गरज आहे. ज्या भागात वांशिक हिंसाचार उसळला आहे त्या भागातील महिलांना सुरक्षित बाहेर काढण्यासाठी तसेच तेथे शांतता प्रस्थापित करण्यासाठी सरकारने योग्य नियोजन करण्याची गरज आहे. मणिपूरला निर्भय महिलांचा वारसा आहे हे आपण विसरता कामा नये. त्यांच्या सोबत उभे राहणे ही आपली जबाबदारी आहे. ‘बेटी बचेगी, तभी तो पढेगी’ हे विसरता कामा नये.
मणिपूर हिंसाचार:व्हायरल व्हिडिओप्रकरणी सातव्या आरोपीला अटक, उर्वरित आरोपींचा मणिपूर पोलिसांकडून शोध सुरू
मणिपूरमध्ये दोन महिलांची विवस्त्रावस्थेत धिंड काढल्याच्या घटनेतील सातव्या आरोपीला पोलिसांनी अटक केली आहे. मणिपूर पोलिसांनी सांगितले की, आरोपीला सोमवारी संध्याकाळी थौबल येथून ताब्यात घेण्यात आले. 19 जुलै रोजी व्हिडिओ व्हायरल झाल्यानंतर 20 जुलै रोजी पहिली अटक करण्यात आली होती. या 7 आरोपींपैकी एक अल्पवयीन आहे. इतर आरोपींच्या अटकेसाठी पोलिस अनेक भागांत छापे टाकत आहेत
