सर्वोत्कर्ष पब्लिक चॅरिटेबल ट्रस्ट तर्फे येत्या १२ नोव्हेंबर गुरुवारी पहाटे ५ वाजता शनिवार वाडा पटांगण येथे दीपावली पाडवा पहाट निमित्ताने स्वरमयी दिवाळी पहाट या कार्यक्रमाचे आयोजन करण्यात आले आहे.
सर्वोत्कर्ष ट्रस्टचा सांस्कृतिक कार्यक्रमाचा हा उपक्रम गेली चार वर्षे नियमितपणे राबवत असून रसिकांच्या उत्स्फूर्त प्रतिसादामुळे या वर्षी हि स्वरमयी दिवाळी पहाट या कार्यक्रमाचे आयोजन करण्यात आले आहे. ‘दीपोत्सव २०१५’ या अंतर्गत आयोजित या कार्यक्रमात रामेश्वरी वैशमपायन, मीनल पोंक्षे, राधा मंगेशकर आणि राजेश दातार यांचे गायन, सिद्धी कोळवणकर यांच्या तर्फे समूह नृत्याचे सादरीकरण तसेच दिपाली कदम यांच्या समूह नृत्याचे सादरीकरण, दगडू शेठ हलवाई ट्रस्टच्या अनाथ मुलांच्या धनगरी नृत्याचे सादरीकरण होणार आहे.
त्याच बरोबर सुशीलकुमार यांच्या हास्य विनोदाचे सादरीकरण आणि विजय जोशी यांचा लोकमान्य टिळक यांच्या वेशातील अभिनय असे या कार्यक्रमाचे स्वरूप असून नाट्य व चित्रपटसृष्टीतील अनेक मान्यवरांची विशेष उपस्थिती असणार आहे. सदर कार्यक्रम विनामुल्य असून काही जागा निमंत्रीत मान्यवरांसाठी राखीव ठेवण्यात आलेल्या आहेत. सर्वोत्कर्ष ट्रस्ट हा गेली ५ वर्षे सांस्कृतिक, सामाजीक आणि अध्यात्मिक क उपक्रम राबवत आहे. सांस्कृतिक उपक्रमा अंतर्गत सदरील कार्यक्रमाचे आयोजन करण्यात आले आहे.
या हि पुढे असे अनेक उपक्रम राबवण्याचा ट्रस्टचा मानस असून रसिक प्रेक्षकांनी या कार्यक्रमाचा आस्वाद घ्यावा असे आवाहन सर्वोत्कर्ष ट्रस्ट तर्फे करण्यात आले आहे. ट्रस्टच्या आध्यत्मिक उपक्रमा अंतर्गत संस्कार ग्रुपच्या वतीने कार्यक्रम स्थळी आरोग्य शिबिराचे आयोजन करण्यात आले आहे. अशी माहिती ट्रस्टचे अध्यक्ष राजेश दातार व संस्कार ग्रुपचे वैकुंठ कुंभार यांनी नुकत्याच आयोजित केलेल्या पत्रकार परिषदेत दिली.
