पुणे-
शिक्षण हक्क कायद्याच्या अंमलबजावणीसाठी गतवर्षी जुलै महिन्यात शिक्षण मंडळाचे
अधिकार काढून घेण्यात आले.स्वयंसेवी संस्था व विविध स्तरातून शिक्षण मंडळाच्या कारभारावर टीका झाल्यानंतर सर्व शालेय साहित्याची खरेदी स्थायी समिती मार्फत करण्याचा निर्णय पुणे मनपा प्रशासनाने घेतला.यामुळे वेळेवर आणि दर्जेदार साहित्य पुरविण्याचे आव्हान मनपा समोर होते व प्रशासनावर मोठी जबाबदारी होती.
मात्र प्रशासनाच्या अकार्यक्षमतेचा फटका विद्यार्थ्याना बसला असून आज शाळा सुरु होवून ९ दिवस झाले तरी अद्याप गणवेश,बूट,दप्तर,वह्या यांची खरेदी प्रक्रिया पूर्ण झाली नसून शालेय साहित्याचे वाटप अद्याप झालेले नाही.
प्रशासनाच्या असंवेदनशीलतेचा दुष्परिणाम विद्यार्थी भोगत असून काही शाळांमध्ये विद्यार्थ्यांना ३/३ वह्या देऊन त्यांची क्रूर थट्टा करण्यात आली आहे.
प्रशासनाने स्थायी समितीच्या माध्यमातून खरेदी प्रक्रियेला गती द्यावी व येत्या ८ दिवसात विद्यार्थ्याना सर्व साहित्य उपलब्ध करून द्यावे अन्यथा भारतीय जनता पार्टी जनांदोलन उभारेल असा इशारा शहर सरचिटणीस संदीप खर्डेकर,शिक्षण मंडळ सदस्य रघु गौडा,सौ.मंजुश्री खर्डेकर व किरण कांबळे यांनी दिला आहे.
