पुणे,: राष्ट्रीय मतदार याद्या शुद्धीकरण आणि प्रमाणीकरण आणि मतदार यादीशी आधारकार्ड संलग्नीकरण करण्यासाठी उद्या रविवार, दि. 28 जून 2015 रोजी विशेष मोहीम राबविण्यात येणार असल्याची माहिती जिल्हा प्रशासनाच्या वतीने देण्यात आली आहे.
जिल्हा प्रशासनाच्या निवडणूक शाखेकडून प्रसिद्धीस दिलेल्या निवेदनात नमूद करण्यात आले आहे की, मतदार यादी शुद्धीकरण आणि प्रमाणीकरण करण्याचे काम तसेच मतदारांचे आधार कार्ड संलग्नीकरण करण्याचे कामासाठी ही मोहीम राबविण्यात येणार आहे. मतदारांची छायाचित्र मतदार ओळखपत्रातील माहिती आणि आधारकार्ड मधील माहिती याची सांगड घालणे, दुबार, मयत आणि स्थलांतरित मतदारांची नावे वगळणे आणि ओळखपत्रातील चुका दुरूस्त करून प्रमाणित मतदार यादी तयार करणे या मोहिमेचे उद्देश आहेत.
मतदान छायाचित्र ओळखपत्र व आधार कार्डशी संलग्न करण्याकामी पर्याय http://ceo.maharashtra.gov.in या संकेतस्थळावर Upload Your aadhar या लिंकवर उपलब्ध करून देण्यात आला आहे. या व्यतिरिक्त आपणास मतदान छायाचित्र ओळखपत्र व आधार कार्डशी संलग्न करण्यासाठी www.eci.com या संकेतस्थळावर National Voters Services Portal (NVSP) या पोर्टलमध्ये Feed your Aadhar Number ला क्लिक करा व तुमचे नाव ईपीएफ नंबर, आधार नंबर, मोबाईल नंबर, ई-मेल आयडी भरून माहिती Submit करा, असे आवाहन जिल्हा प्रशासनाने केले आहे.
रविवार, दि. 28 जून 2015 रोजी रोजी सकाळी दहा ते सायंकाळी पाच या वेळेत सर्व मतदार नोंदणी अधिकारी कार्यालये, सहाय्यक मतदार नोंदणी अधिकारी कार्यालय, पुणे आणि पिंपरी चिंचवड महानगरपालिकेच्या भागातील क्षेत्रीय कार्यालये, मतदान केंद्रे, गट विकास अधिकारी आणि पंचायत समिती कार्यालये आणि नगर पालिका आणि परिषद कार्यालये येथे केंद्रे सुरु राहतील. याठिकाणी सर्व नागिरकांनी संपर्क साधून या मोहिमेचा लाभ घ्यावा.
मतदारांनी मतदार यादीतील आपल्या नावाची खात्री करावी. यादीतून वगळलेल्या किंवा वगळण्यासाठी प्रस्तावित असलेल्या नावाची यादी मुख्य निवडणूक अधिकारी यांच्या http://ceo.maharashtra.gov.in या संकेतस्थळावर उपलब्ध आहे. अधिक माहितीसाठी टोल फ्री क्रमांक 1950 किंवा जिल्हाधिकारी व जिल्हा निवडणूक यांचे कार्यालयाशी संपर्क साधावा.
मतदारयादीत बदल करण्यासाठी खालील प्रमाणे अर्ज भरून द्यावे. हे अर्ज फक्त मतदार नोंदणी अधिकारी कार्यालय, सहाय्यक मतदार नोंदणी कार्यालय आणि क्षेत्रीय कार्यालयात उपलब्ध ठेवण्यात आले आहेत.
अर्ज खालील प्रमाणे
नमुना क्रमांक 7 – मतदार यादीतील नाव वगळण्यासाठी
नमुना क्रमांक 8 – मतदार यादीतील तपशीलात बदल करण्यासाठी
नमुना क्रमांक 8 अ – विधानसभा मतदार संघातंर्गत पत्ता बदलण्यासाठी
प्रपत्र अ – मतदार ओळखपत्र आणि आधार क्रमांक यांची सांगड घालण्यासाठी
