पुणे : बहुप्रतिक्षित अशा देशातील पहिल्या सुपर कारचे, डीसी अवंतीचे
पुण्यात एका शानदार समारंभात अनावरण करण्यात आले. प्रसिद्ध कार डिझाईनर
दिलीप छाब्रिया यांच्या संकल्पनेतून साकार झालेल्या या कारमुळे कारच्या
बाजारपेठेत खळबळ उडण्याची शक्यता असून या कारद्वारे भारतात कारची एक
वर्गवारी निर्माण झाली आहे.
या कार्यक्रमाला खुद्द छाब्रिया यांच्या समवेत भारतीय जनता पक्षाचे महाराष्ट्र
प्रदेश उपाध्यक्ष चैनसुख संचेती, आदिवेणु मोटार्सचे वेणुगोपाल तापडिया आणि
आदित्य तापडिया हे उपस्थित होते. ही कार पुण्याच्या आदिवेणु मोटर्सच्या शो-
रूममध्ये सादर करण्यात आली कारचे औपचारिक अनावरण झाल्यानंतर सिद्धार्थ
भन्साली यांना डीसी अवंतीचे पहिले ग्राहक म्हणून कारच्या चाव्या हस्तांतरित
करण्यात आल्या.
यावेळी बोलताना डीसी डिझाईनचे अध्यक्ष आणि व्यवस्थापकीय संचालक श्री.
दिलीप छाब्रिया म्हणाले, की त्यांच्या स्वप्नातील ही कार बनविण्यासाठी 33 महिने
आणि 150 कोटी रुपयांची गुंतुवणूक लागली. “डीसी अवंती ही माझ्या स्वप्नातील
कार आहे कार आणि आम्ही अगोदरच 300 कार विकल्या आहेत. या क्षेत्रातील
आमच्या ज्ञानाच्या बळावर आम्ही हे साध्य करू शकलो. कोणत्याही विकसनशील
देशामध्ये बनविलेली ही पहिली सुपर कार असून भारतात त्यामुळे कारची एक
नवी वर्गवारी तयार झाली आहे. आम्ही दाखवून दिले आहे, की पहिल्या जगातील
कोणत्याही देशाइतकेच आम्हीही सक्षम आहोत.”
तरुणांना स्पोर्ट्स कार विकत घ्यायची आहे परंतु बाजारात त्यांच्यासाठी त्या
उपलब्ध नाहीत, ही या कारच्या मागची संकल्पना आहे असे त्यांनी सांगितले.
“भारताच्या कार बाजारातील हा क्रांतीकारी बदल आहे,” ते म्हणाले.
डीसी या नावाने परिचित असलेल्या छाब्रिया यांनी सांगितले, की डीसी अवंती
ही फेरारी आणि लँबोर्गिनी यांसारख्या कारशी स्पर्धा करेल परंतु किंमत ही तिच्या
दृष्टीने प्रचंड अनुकूल बाब ठरेल. परदेशी कारच्या तुलनेत या कारची किंमत केवळ
एक दशांश आहे आणि त्यामुळे भारतीय लोकांना स्पोर्ट्स कार चालविण्याचे आपले
स्वप्न साकार करता येईल. “माझा अनुभव सांगतो, की युवकांना स्पोर्ट्स कार
घ्यायची आहे परंतु परदेशी कार विकत घेणे त्यांना परवडत नाही. डीसी अवंती ही
त्यांना आपली हौस पूर्ण करणे शक्य करेल,” असे ते म्हणाले.
छाब्रिया यांच्या कष्टांचे कौतुक करून श्री. चैनसुख संचेती म्हणाले, “आज मी
डीसींच्या वर्कशॉपला भेट दिली आणि प्रचंड प्रभावित झालो. छाब्रिया यांनी जे
अनुभवले आणि जी कल्पना केली, त्याचे प्रतिबिंब या कारमध्ये पडले आहे. ही
एकमेवाद्वितीय अशी कार आहे आणि या प्रसंगी मी त्यांचे खास अभिनंदन करतो.
ही कल्पनेबाहेरची गोष्ट आहे आणि त्यांनी यासाठी खूप मेहनत घेतली आहे”.
या कारच्या चाव्या घेतल्यानंतर आपला आनंद प्रदर्शित करताना सिद्धार्थ
भन्साली यांनी सांगितले, “मी यासाठी डीसीं व आदिवेणु मोटर्सला धन्यवाद
देईन. ही कार पैशाचा पूरेपूर मोबदला देते आणि माझ्यासारखे युवक कारचे क्रेझी
असतात. डीसी अवंती ही अशा युवकांसाठी योग्य अशी भेट आहे”.
डीसी अवंती पहिल्यांदा कॉन्सेप्ट कारच्या स्वरूपात 2012 साली ऑटो
एक्सपोमध्ये नवी दिल्ली येथे सादर करण्यात आली होती. 2014 साली ऑटो
एक्सपोमध्ये या कारचे प्रॉडक्शन मॉडल सादर करण्यात आले होते.
डीसी अवंतीमध्ये रेनॉल्टचे 2.0 लिटर टर्बो युरो 5 पेट्रोल इंजिन असून 250
एचपीची कमाल शक्ती आहे. तीत सर्वाधिक 340 एनएमचा टॉर्क लाभतो. या
कारचा वेग ताशी 200 किमी वर इलेक्ट्रॉनिक पद्धतीने मर्यादित केलेला असून 6
सेकंदांत ताशी 100 किमीचे अक्सीलरेशन ती गाठते. आदिवेणु मोटर्सतर्फे हि गाडी
महाराष्ट्रासाठी उपलबद्ध असणार आहेत.
डीसी अवंती तांत्रिक माहिती
एकूण लांबी 4565 मिमी
एकूण रुंदी 2120 मिमी
एकूण उंची 1200 मिमी
व्हीलबेस 2700 मिमी
टर्निंग रेडियस 6 मी.
क्षमता 2000 सीसी
सर्वोच्च शक्ती 250 बीएचपी @5500 आरपीएम
सर्वोच्च टॉर्क 340 एनएम @2750 ते 5000 आरपीएम
कमाल वेग ताशी 200 किमी वर इलेक्ट्रॉनिक पद्धतीने मर्यादित
त्वरण 6 सेकंदांत ताशी 100 किमी
बॉडी कार्बन कम्पोझिट टू डोअर फास्टबॅक
आसने दोन
