पुणे :
‘महाराष्ट्र कॉस्मॉपॉलिटन एज्युकेशन सोसायटी’ (आझम कॅम्पस) च्या वतीने हजरत महम्मद पैगंबर जयंतीनिमित्त अल्पसंख्यंक विद्यार्थ्यांच्या अभिवादन मिरवणुकीचे आयोजन करण्यात आले होते. गुरूवारी आयोजित या मिरवणुकीचे उद्घाटन सकाळी संस्थेचे अध्यक्ष पी. ए. इनामदार व युनानी मेडिकलचे अध्यक्ष डॉ.एन.वाय.काझी यांच्या हस्ते झाले. संस्थेच्या 29 विद्यालये व महाविद्यालयामधील पाच हजार विद्यार्थी या मिरवणुकीत सहभागी झाले होते. संस्थेचे सचिव लतिफ मगदूम यांनी या मिरवणुकीचे नेतृत्व केले.
मिरवणुकीत 2 घोडा बग्गी, दरबार ब्रान्झपथक, ढोलताशा यांचा समावेश होता. अँग्लो उर्दू बॉईज हायस्कूलच्या विद्यार्थ्यांनी हजरत महंमद पैगंबर यांनी दिलेल्या शिक्षण, व्यसनमुक्ती संदर्भात संदेशाचे फलक हाती धरले होते. अॅग्लो उर्दू बॉईज हायस्कूलचे विद्यार्थी अरबी वेश परिधान करून घोडागाडीमध्ये विराजमान झाले होते, हे मिरवणुकीचे विशेष आकर्षण ठरले.
मिरवणुकीमध्ये विद्यार्थ्यांबरोबर शाहिद इनामदार, महम्मद हनीफ शेख, वाहाब शेख, वाहिद बियाबानी, सिकंदर पटेल, अरीफ सय्यद, डॉ. शैला बूटवाला, मुमताझ सय्यद, रबाब खानल रूमाना शेख, आयेशा शेख, प्रा.डॉ.भूषण पाटील, संस्थेचे पदाधिकारी, प्राचार्य, शिक्षकवर्ग, कर्मचारी वर्ग मोठ्या संख्येने सहभागी झाले होते. मिरवणुकीस डेक्कन मुस्लिम इन्स्टिट्यूट येथून प्रारंभ होऊन ट्रायलॅण्ड हॉटेल, गायकसाब मशीद, बाबाखान दर्गा, सरबतवाला चौक, जुना मोदीखाना, क्वाटरगेट, मॉर्डनबेकरी चौक, इस्लामपुरा, ए.डी.कॅम्प चौक, भारत सिनेमा, पद्मजी पोलीस चौकी, निशांत टॉकीज, भगवानदास चाळ, चुडामण तालिम अशी मार्ग क्रमणा करून पुना कॉलेज गेट नं.2 येथे समारोप झाला. भगवानदास चाळ, केंजळे चाळ येथील नागरिकांनी विद्यार्थ्यांना वेफर्सचे वाटप केले. दरवर्षी एम.सी.ई संस्थेतर्फे छत्रपती शिवाजी महाराज, म. फुले, डॉ. बाबासाहेब आंबेडकर आणि महंमद पैगंबर यांच्या जयंतीदिनी त्यांना अभिवादन करण्यासाठी भव्य मिरवणुका काढल्या जातात.
