पुणे – पेट्रोल पंपावर दरोड्याच्या तयारीत असलेल्या टोळीस भारती विद्यापीठ पोलिसांनी बुधवारी मध्यरात्री जेरबंद केले. या टोळीतील चौघांना अटक केली असून, तिघे पसार झाले आहेत. त्यांच्याकडून कोयता, मिरचीपावडर, मोबाईल, दरोड्याचे साहित्य आणि दुचाकी जप्त केली आहे.
वरिष्ठ पोलिस निरीक्षक मच्छिंद्र चव्हाण यांनी दिलेल्या माहितीनुसार, कात्रज परिसरात रात्रीची गस्त सुरू असताना शकुन टाइल्स दुकानासमोर तीन दुचाकींवर सातजण असून, ते बेलदरे पेट्रोलपंपावर दरोडा टाकण्याच्या तयारीत होते. ही बाब समजल्यानंतर पोलिसांनी रात्री दीड वाजता छापा टाकला. अर्जुन जगत चौधरी (वय 27, रा. काळेवाडी), अविनाश धनाजी शिंदे (वय 27, रा. सुंदरनगर), महेश मधुकर पांडव (वय 19, रा. संतोषनगर, कात्रज) आणि प्रदीप राजदीप चौधरी (वय 24, रा. काळेवाडी) अशी आरोपींची नावे आहेत. तर, अक्षय चौधरी, नितीन पालखे आणि उल्हास असे तिघेजण पसार झाले आहेत. उपनिरीक्षक उत्तम बुदगुडे, हवालदार प्रदीप गुरव, प्रकाश मोरे, संजय गायकवाड आदी कर्मचाऱ्यांनी ही कारवाई केली. दरम्यान, आरोपींनी चार महिन्यांपूर्वी कात्रज डेअरी परिसरात एका व्यापाऱ्यास डोळ्यांत मिरचीपावडर टाकून रोकड लुटल्याचे निरीक्षक चव्हाण यांनी सांगितले.