पुण्यातील फर्ग्युसन कॉलेजसह देशभरातील १९ महाविद्यालयांना ‘हेरिटेज’चा दर्जा!

मुंबई-‌शेकडो वर्षांपासूनच्या  शिक्षणसंस्थांचे जतन आणि संवर्धन व्हावे यासाठी अशा कॉलेजांना ‘हेरिटेज’ दर्जा देण्याचा निर्णय विद्यापीठ अनुदान आयोगाने (यूजीसी) घेतला असून, मुंबईतील सेंट झेवियर्स, पुण्यातील फर्ग्युसन आणि नागपूरमधील हिस्लॉप या ऐतिहासिक कॉलेजांचा समावेश आहे. यूजीसीने देशभरातील १९ हेरिटेज कॉलेजांची यादी रविवारी जाहीर केली. त्यात राज्यातील या तीन कॉलेजांना मानाचे स्थान मिळाले आहे.
या ‘हेरिटेज’ कॉलेजांना यूजीसीकडून विशेष आर्थिक मदत दिली जाणार असून, कॉलेज कॅम्पसचे नूतनीकरण किंवा ‘हेरिटेज’संदर्भात नवीन अभ्यासक्रम सुरू करण्यासाठी ती वापरण्यात येईल. सेंट झेवियर्सला १ कोटी ५३ लाख तर, फर्ग्युसन आणि हिस्लॉप कॉलेजला प्रत्येकी २० लाखांचे अनुदान देण्यात आले आहे.
झेवियर्स कॉलेज – स्थापना सन १८६९ मध्ये. सुरुवातीला केवळ आर्टसचे श‌क्षिण देणाऱ्या या कॉलेजमध्ये सन १९२० पासून सायन्स विभागाचाही समावेश. इंड‌ो-गॉथ‌कि शैलीतील बांधकाम असलेली ही वास्तू मुंबईतील देखण्या इमारतींपैकी एक आहे.
फर्ग्युसन कॉलेज – डेक्कन एज्युकेशन सोसायटीतर्फे सन १८८५ मध्ये स्थापना झाली. कॉलेजच्या उभारणीसाठी १२०० रुपयांची देणगी देणारे मुंबईचे गव्हर्नर सर जेम्स फर्ग्युसन यांचे नाव कॉलेजला देण्यात आले.
हिस्लॉप कॉलेज – रेव्ह. स्टिफन हिस्लॉप यांच्या नावाने ओळखली जाणारी ही संस्था सन १८८३ मध्ये सुरू झाली. तेव्हापासून आजतागायत या संस्थेने समाजातील विविध घटकांना उच्च शिक्षणाच्या संधी उपलब्ध करून दिल्या आहेत.
देशभरातील शेकडो वर्षे जुन्या कॉलेजांना हेरिटेजचा दर्जा देण्यासाठी विद्यापीठ अनुदान आयोगातर्फे अशा कॉलेजांकडून प्रस्ताव मागविले होते. त्यानुसार ६० कॉलेजांनी अर्ज केले. त्यांच्यात राजधानी दिल्लीतील एकाही कॉलेजचा समावेश नव्हता. अर्ज प्राप्त झालेल्या ६० कॉलेजांपैकी १९ कॉलेजांना हेरिटेजचा दर्जा देण्यात आला आहे