पुणे-पुणे महानगरपालिकेचा 15 हजार 669 कोटी रुपयांचा अर्थसंकल्प मंगळवारी स्थायी समिती अध्यक्ष श्रीनाथ भिमाले यांनी सादर केला. शहराचा सर्वांगीण विकास, पर्यावरण संवर्धन आणि नागरिकांना उत्तम सुविधा पुरवण्यावर या अर्थसंकल्पात विशेष भर देण्यात आला आहे. पुणे शहर राहण्यासाठी सर्वोत्तम बनवण्यासाठी आम्ही कटिबद्ध आहोत, असे भिमाले यांनी यावेळी सांगितले.महिलांसाठी विशेष योजना जाहीर करताना, 31 मार्च 2026 पर्यंत मालमत्तेवर नाव असलेल्या महिलांना 50 टक्के करसवलत देण्याचा निर्णय घेण्यात आला आहे. शहरात 100 मोफत स्वच्छतागृहे उभारण्याची योजना असून, महिलांना स्वसंरक्षणासाठी प्रशिक्षणही देण्यात येणार आहे.
या अर्थसंकल्पात वाहतूक आणि पर्यावरण क्षेत्रासाठी महत्त्वाच्या योजना जाहीर करण्यात आल्या आहेत. पुणे शहरात 1 हजार ई-बसेस उपलब्ध करून देण्याचा निर्णय घेण्यात आला आहे. तसेच, प्रदूषण नियंत्रणासाठी देशातील पहिली अत्याधुनिक यंत्रणा उभारण्याचा प्रस्ताव आहे. सध्या शहरातील प्रदूषण पातळी 350 पर्यंत पोहोचली असून ती 50 पर्यंत खाली आणण्याचे उद्दिष्ट ठेवण्यात आले आहे.
आरोग्य क्षेत्रातही मोठ्या योजना जाहीर करण्यात आल्या आहेत. महापालिकेच्या 53 बाह्यरुग्ण विभाग आणि 20 प्रसूतिगृहांमार्फत मोफत सेवा दिली जात असून, नागरिकांना 80 कोटी रुपयांची औषधे विनामूल्य उपलब्ध करून दिली जात आहेत. बाणेर येथे कॅन्सर रुग्णालय उभारण्यात आले असून, लवकरच त्याचे उद्घाटन मुख्यमंत्री देवेंद्र फडणवीस यांच्या हस्ते होणार आहे. वारजे येथे मल्टीस्पेशालिटी रुग्णालयाचे कामही सुरू आहे.
शहरी गरिबांसाठीच्या योजनेला अजित पवार यांचे नाव देण्यात येणार असून, त्यासाठी 80 कोटी रुपयांची तरतूद करण्यात आली आहे. तसेच, शहरातील उद्याने, तलाव आणि प्राणीसंवर्धनावरही भर देण्यात आला आहे. राजीव गांधी झुलॉजिकल पार्कच्या विकासासाठी 60 कोटी रुपये राखीव ठेवण्यात आले असून, नवीन वन्यप्राणी आणण्याचा आराखडा तयार करण्यात आला आहे.
