पालघरचे प्रस्तावित क्रीडा संकूलाचे काम युध्दपातळीवर करा -पालकमंत्री व सार्वजनिक बांधकाम मंत्री रविंद्र चव्हाण

मुंबई, दि.२०: पालघरच्या जिल्हा क्रीडा संकूल समितीची उभारणी सार्वजनिक बांधकाम विभागामार्फत युध्दपातळीवर करण्यात यावी व त्या अनुषंगाने तातडीने कार्यवाही करावी अश्या सूचना सार्वजनिक बांधकाम विभागाचे मंत्री आणि पालघरचे पालकमंत्री रविंद्र चव्हाण यांनी आज दिल्या
पालघरच्या जिल्हा क्रीडा संकूलसंदर्भात स्थापन केलेल्या समितीची बैठक आज पालकमंत्री रविंद्र चव्हाण यांच्या अध्यक्षतेखाली व्हीडीओ कॉन्फरन्सीच्या माध्यमातून पार पडली. या बैठकीला पालघरचे जिल्हाधिकारी गोविंद बोडखे, महापालिका आयुक्त अनिल कुमार, जिल्हा परिषदेचे मुख्य कार्यकारी अधिकारी बी.जी.पालवे, पालघरचे जिल्हा पोलिस अधिक्षक बाळासाहेब पाटील, क्रीडा विभागाचे प्रभारी उपसंचालक स्नेहल साळुंके, सार्वजनिक बांधकाम विभागाचे कार्यकारी अभियंता सचिन पाटील, पालघरचे जिल्हा क्रीडा अधिकारी सुहास व्हनमाने, जिल्हा माहिती अधिकारी राहूल भालेराव आदी मान्यवर उपस्थित होते.
पालघरमध्ये 16 एकरच्या प्रशस्त भूखंडावर जिल्हा क्रीडा संकूल प्रस्तावित करण्यात आले आहे. या संकूलाच्या निर्मितीसाठी कोटींचा निधी मंजूर झालेला असून 2.00 कोटींचा निधी प्राप्त झाला आहे. संकूल उभारणीसाठी आवश्यक टेंडर प्रक्रीया आठवडयाभरात सूरु करुन पुढील कार्यवाही तातडीने करण्यात यावी व या दृष्टीने गतीने प्रयत्न करण्याची सूचना मंत्री चव्हाण यांनी दिली.
आज झालेल्या व्हीडीओ कोन्फरंसिंगमध्ये चव्हाण यांनी प्रस्तावित जिल्हा क्रीडा संकूलाच्या मध्ये उभारण्यात येणाऱ्या विविध क्रीडा सुविधांच आढावा घेतला. या क्रीडा सूविधांमध्ये 400 मीटरचा ट्रॅक, खुले प्रेक्षागृह, विविध खेळांची क्रीडांगणे, फीटनेस सेंटर, जलतरण तलाव, इनडोअ मॉल, मुलामुलींचे वसतीगृह, खेळाचे साहित्य आदी विविध बाबींचा समाावेश आहे.
प्रस्तावित क्रीडा संकूलाची उभारणी करण्याच्या दृष्टीने त्या कामांचा दर्जा व तांत्रिक गोष्टी कशा पध्दतीने परिपूर्ण होतील व हे काम उत्कृष्टरित्या पार पडेल याकडे सर्व अधिकाऱ्यांनी लक्ष देणे आवश्यक आहे. या संकूलाच्या उभारणीच्या कामात क्रीडा क्षेत्रातील मान्यवरांचा सहभाग व त्यांच्या सूचना आदींचा प्राधान्याने विचार करण्याच्या सूचनाही पालकमंत्री चव्हाण यांनी दिल्या.