महावितरणची विशेष मोहिमेतील कारवाई
पुणे : महावितरणच्या मुळशी विभागअंतर्गत 12 गावांत नुकत्याच झालेल्या वीजमीटरच्या विशेष तपासणी मोहिमेत 41 लाख 25 हजार रुपयांच्या विजेचा अवैध वापर उघडकीस आला आहे. यात 26 लाख 50 हजार रुपयांच्या वीजचोरीसह 14 लाख 75 हजार रुपयांच्या विजेचा अनधिकृत वीजवापर आढळून आला आहे.
नसरापूर उपविभाग अंतर्गत वेळू, रांजे, शिवापूर, खेड-शिवापूर टोलनाका, कासुर्डी, कापूरओहळ, हरिश्चंद्गी, नसरापूर बाजारपेठ, वेल्हा बाजारपेठ, पालगाव, गौडदरा, पाबे आदी गावांत मंगळवारी (दि. 2) 187 ग्राहकांच्या वीजमीटरची तपासणी करण्यात आली. यासाठी मुळशी विभाग कार्यालय व नसरापूर उपविभागातील अभियंता तसेच जनमित्र यांची 9 पथके तयार करण्यात आली होती. महावितरणच्या पथकांनी केलेल्या तपासणीत 42 ठिकाणी 26 लाख 50 हजार रुपयांची वीजचोरी आढळून आली. यात घरगुती, वाणिज्यिक ग्राहकांचा समावेश आहे. तसेच 26 ठिकाणी ठिकाणी 14 लाख 75 हजार रुपयांच्या विजेचा अनधिकृत वापर आढळून आला. वीजचोरी प्रकरणी कलम 135 अन्वये तर अनधिकृत वीजवापर प्रकरणी कलम 126 अन्वये कारवाई करण्यात येत आहे. याशिवाय तपासणी मोहिमेत नादुरुस्त व सदोष मीटर दिसून आले ते बदलण्यात आले. तसेच ज्या मीटरचे रिंडींग घेतले जात नव्हते अशा मीटरचे रिंडींग घेण्यात आले आहे.
पुणे परिमंडलाचे मुख्य अभियंता श्री. रामराव मुंडे यांच्यासह पुणे ग्रामीण मंडलचे अधीक्षक अभियंता श्री. सुनील पावडे, कार्यकारी अभियंता श्री. राजेंद्ग पवार, उपकार्यकारी अभियंता सर्वश्री राहुल डेरे, किरण सरोदे आदींसह 42 अभियंता, कर्मचारी या मोहिमेत सहभागी झाले होते.
