‘कॅशलेस’चे उपचार करण्याबाबत रुग्णांची हेळसांड पुण्यात सुरूच …

पुणे –
‘कॅशलेस’चे उपचार करण्याबाबत  रुग्णांची हेळसांड पुण्यासारख्या प्रगत म्हणविणार्या शहरात सुरूच असून अद्याप सरकार त्यातून मार्ग काढू शकलेले नाही तब्बल सव्वा महिन्यांपासून हॉस्पिटलचालकांसह प्रसारमाध्यमांकडून संपर्क साधल्यानंतर विमा कंपन्यांचे अधिकारी दाद देत नव्हते. बैठकीनिमित्ताने प्रथमच आमने सामने आलेल्या हॉस्पिटल असोसिएशनचे डॉक्टर आणि विमा कंपन्यांचे वरिष्ठ अधिकारी यांच्या बैठकीनंतर त्यांच्यात ‘कॅशलेस’च्या दर निश्चितीवरून वादावादी झाली. अखेर विमा कंपन्यांच्या अधिकाऱ्यांनीच आपल्याला बोलण्याचे अधिकार नाही असे म्हणून काढता पाय घेतला.
‘विमा कंपन्यांकडे असलेले तज्ज्ञ हे प्रॅक्टिसिंग डॉक्टर नसल्यानेच त्यांना वाटेल ते दर निश्चित करतात,’ असा आरोप करून ‘एम्स’च्या डॉक्टरांकडून दर ठरविले जातात का, असा सवालही डॉक्टरांनी विमा कंपन्यांच्या अधिकाऱ्यांना केला. त्यावर ‘आम्ही स्वतः दर न ठरविता कंपन्यांचे अधिकारी ठरवितात. देशातील दहा शहरांमध्ये अशा प्रकारचे दर निश्चिती करण्यात आली आहे. त्याच दरानुसार त्या ठिकाणी ‘कॅशलेस’ सेवा-सुविधा सुरू आहे. मग पुण्यात निश्चित केलेल्या दरानुसार हॉस्पिटलना ‘कॅशलेस’चे उपचार देण्याबाबत अडचण काय,’ असा सवाल विमा कंपन्यांच्या अधिकाऱ्यांनी उपस्थित केला.
पत्रकार परिषदेनंतर प्रसारमाध्यमांनी विमा कंपन्यांच्या अधिकाऱ्यांची भेट घेतली. विमा कंपन्यांचे धोरण काय, हॉस्पिटलना ‘कॅशलेस’चे दर मान्य का नाहीत, असा सवाल अधिकाऱ्यांना केला. त्या वेळी ‘याबाबत आम्हाला भाष्य करण्याचे अधिकार नाहीत, विमा कंपन्यांच्या ध्येय-धोरण, दरनिश्चितीबाबत कंपनीचे अध्यक्षच माध्यमांशी बोलू शकतात.’ असे के. केदारेश्वरन यांनी सांगितले.
शहरातील ८० हॉस्पिटलकडून कॅशलेस सेवा स्वीकारण्यात आली आहे. त्यापैकी ४१ हॉस्पिटलशी आमचे करार झाले आहेत. अन्य काही हॉस्पिटलांनी सध्या अंमलबजावणी केली नाही, तर उर्वरित हॉस्पिटलकडून आम्हाला सहकार्य मिळत नसल्यानेच ‘कॅशलेस’चा वाद झाला. त्यामुळे वरिष्ठांकडून पुण्यातील ‘कॅशलेस’ सेवा खंडित करण्याचे आदेश देण्यात आल्याचे विमा कंपन्यांच्या अधिकाऱ्यांनी जावडेकर यांना बैठकीत सांगितले.