आमदार जितेंद्र आव्हाड यांच्यावर सांगलीत हल्ला …

सांगली -मिरज दंगलीचा सूत्रधार शिवप्रतिष्ठानचे संभाजी भिडे असल्याचा आरोप करणाऱ्या आमदार जितेंद्र आव्हाड यांच्यावर शिवप्रतिष्ठाच्या कार्यकर्त्यांनी आज हल्ल्याचा प्रयत्न केला. दीनानाथ मंगेशकर नाट्यगृहात शिवसन्मान जागर परिषदेत आव्हाड यांचे भाषण सुरू असताना शिवप्रतिष्ठानचे चार-पाच कार्यकर्ते घोषणा देत व्यासपीठावर गेले आणि त्यांनी आव्हाड यांच्यावर हल्ला करण्याचा प्रयत्न केला. त्यावेळी खालून कार्यकर्त्यांनी हल्लेखोरांवर खुर्च्या फेकल्या. यावेळी झालेल्या झटापटीत एकाला जमावाने लाथाबुक्‍क्‍यांनी चोपले. या प्रकारामुळे तणाव निर्माण झाला. शिवशाहीर बाबासाहेब पुरंदरे यांना जाहीर झालेला ‘महाराष्ट्र भूषण पुरस्कार’ रद्द करावा, या मागणीसाठी रविवारी सांगलीत आयोजित करण्यात आलेल्या शिवसन्मान जागर परिषदेत हा प्रकार घडला या कार्यक्रमात भाषण करणारे राष्ट्रवादी काँग्रेसचे आमदार जितेंद्र आव्हाड यांच्या गाडीवरही दगडफेक करण्यात आली.
दीनानाथ मंगेशकर नाट्यगृहात आयोजित या परिषदेत आमदार आव्हाड यांचे भाषण सुरू असताना ‘जय भवानी, जय शिवाजी’ अशा घोषणा देत ‘भाषण बंद करा,’ असे धमकावत ‘शिवप्रतिष्ठान’चे १०-१२ कार्यकर्ते व्यासपीठावर धावले. हे लक्षात येताच परिषदेला उपस्थित असलेल्या काहींनी नाट्यगृहातील खुर्च्या त्या कार्यकर्त्यांच्या दिशेने भिरकावल्या. काहींनी व्यासपीठावर धाव घेऊन ‘शिवप्रतिष्ठान’च्या कार्यकर्त्यांना बदडले. शिवप्रतिष्ठानच्या कार्यकर्त्यांना मारहाण झाल्याचे समजल्याने शहर पोलिस ठाण्याच्या परिसरात मोठा जमाव एकत्रित येऊन मारहाण करणाऱ्यांना अटक करण्याची मागणी करीत सोमवारी सांगली बंदची हाक देण्यात आली. ‘लोकसभेत आणि राज्यात सत्ताबदल झाला की काय होतेय, याचा हा प्रत्यय आहे. याचा वणवा मंत्रालयातील सहाव्या मजल्यापर्यंत पोहचवू,’ असे आव्हाड म्हणाले.