दुबई : कोणाचे नशीब कधी, कुठे, कसे फळेल, हे सांगता येत नाही. संयुक्त अरब अमिरातीमधील अवघ्या २८ दिवसांच्या एका भारतीय मुलीला ज्ॉकपॉट लागला असून, दुबई शॉपिंग फेस्टिव्हलमधील एका लकी ड्रॉ योजनेत तिने तब्बल २४ लाख रुपयांचे सोने-हिर्यांचे दागिने जिंकले आहेत.
नितेरा जनार्दन असे या मुलीचे नाव असून, अजाणत्या वयातच तिला ही दागिन्यांची लॉटरी लागली आहे. नितेराचे वडील अनिल जनार्दन यांनी सांगितले की, आम्ही केरळी असल्याने मूल जन्माला आल्याच्या २८ दिवसांनंतर उत्सव साजरा करत असतो. त्यानुसार माझी मुलगी २८ दिवसांची झाल्यानंतर आम्ही तिच्या नावे काही सोने खरेदी केले. दुबईतील चलनानुसार आम्ही २ हजार दिरहमची (सुमारे ३४ हजार रुपये) सोन्याची साखळी आणि कडे घेतले. दुबईत १ जानेवारी ते १ फेब्रुवारीपर्यंत शॉपिंग फेस्टिवल सुरू असल्याने एक लकी ड्रॉ योजनेअंतर्गत आम्ही मुलीच्या नावे काही कूपनही भरून दिले. या कूपन्सला सुमारे २४ लाख रुपयांच्या सोने-हिर्यांच्या दागिन्यांचे बक्षीस लागल्याचे समजले. सुरुवातीला आम्हाला कोणीतरी चेष्टा करत असल्याचे वाटले; परंतु नंतर आमच्या मुलीने खरेच २४ लाखांची आभूषणे जिंकल्याचे कळल्यानंतर आम्हाला आनंदाने वेड लागण्याची वेळ आली होती, असे जनार्दन म्हणाले. या योजनेत एकूण तीन विजेते असून, त्यापैकी दोन भारतीय आहेत. विनय वर्गीस या भारतीयानेही सुमारे २ लाख रुपयांची एक अंगठी जिंकली आहे.