पुणे – महापालिकेच्या चार रुग्णालयांमध्ये अवघ्या पन्नास रुपयांमध्ये, तर गर्भवतींसाठी मोफत सोनोग्राफी सुविधा उपलब्ध करून देण्याचा निर्णय आरोग्य विभागाने घेतला आहे. पुढील महिन्यापासून ही सेवा उपलब्ध करून देण्यात येणार असल्याची माहिती महापालिकेचे सहायक आरोग्य प्रमुख डॉ. सुनील तोरे यांनी दिली.
खासगी रुग्णालयात सोनोग्राफीसाठी अडीचशे ते सातशे रुपये शुल्क आकारले जाते. गरीब रुग्णांसाठी हे शुल्क भरणेही कठीण होते. त्यामुळे मंगळवार पेठेतील कमला नेहरू रुग्णालय, सोनवणे हॉस्पिटल, येरवडा येथील राजीव गांधी हॉस्पिटल आणि मगरपट्टा येथील कोद्रे या चार दवाखान्यांमध्ये पन्नास रुपयांमध्ये सोनोग्राफीची सुविधा उपलब्ध करून देण्यात येणार आहे. भविष्यात अन्य सुविधाही अशाप्रकारे सवलतीच्या दरात उपलब्ध होणार आहेत. गेल्या महिन्यात महापालिकेने एका स्वयंसेवी संस्थेच्या सहकार्याने सवलतीच्या दरात डायलेसिसची सुविधा उपलब्ध करून देण्यास मान्यता दिली आहे.