येथे कहाणी संग्रह मिळेल- गजानन बुक डेपोमधील बोर्ड वाचला आणि कहाणी संग्रहाचे पुस्तक गोष्टींसकट डोळ्यांसमोर फेर धरू लागले. श्रावण महिना चालू झाला की रोज संध्याकाळी त्या त्या वाराची कहाणी प्रार्थना आणि परवाचा म्हणून झाल्यानंतर वाचण्याचा नेम असायचा.
एक आटपाट नगर होते… या वाक्यानेच बहुतेक कहाण्यांची सुरुवात असे… प्रत्येक वाराची अशी कहाणी तर होतीच पण नागपंचमी, रक्षाबंधन , शिळा सप्तमी…अशा खास सणांच्याही वेगळ्या कहाण्या असायच्या. श्रावण महिन्यात तर सणावळांची रेलचेल, त्यामुळे तो विशेष आवडीचा. शाळांनाही भरपूर सुट्ट्या असायच्या. श्रावणी सोमवारी शाळा अर्धा दिवस कारण दिवे लागणीच्या आत उपवास सोडायचा. संध्याकाळी आजीबरोबर शंकराच्या देवळात जाऊन आलो की उपवास सोडायला सगळे एकत्र जेवायला बसायचो. (आजी खूप देव देव करणारी नव्हती, माणुसकी हाच तिचा देव धर्म.) आमच्या घरी काम करणारे सहदेव काकाही आमच्या सोबतच उपवास सोडायला बसायचे. सहदेव काम नंतर कर आधी उपवास सोडायला ये बघू- आजी बोलवूनच आणायची त्यांना
सहदेव काकालाही वाचनाची खूप आवड. श्रावण महिन्यात तो हरी कथासार, महाभारताच्या गोष्टी असे काही ना काही तरी धार्मिक-अध्यात्मिक पुस्तक वाचायचा. त्याने वाचलेली गोष्ट मग तो आम्हा भावंडांना छानपैकी त्याच्या शैलीत रंगवून सांगायचा. त्याची गोष्ट ऐकायला भलतीच मजा यायची.
नागपंचमी, रक्षाबंधन सगळेच सण आवडायचे आणि खास आवडता सण म्हणजे जन्माष्टमी. दहीहंडी फोडताना बघायची एक वेगळीच मजा होती. त्या दिवशी सकाळी सकाळी बाबा नाहीतर सहदेव काका वर्दी देऊन जायचे की विजयनगरची हंडी बांधली, रानडे रोडची अजून बांधली नाही. साधारण मग सकाळी १० नंतर बाबा हंडी बघायला घेऊन जायचे. ३-४ हंड्या बघून जेवणाच्या वेळेपर्यंत घरी यायचो. मग परत जेवून झाले की सहदेव काकाबरोबर हंड्या बघायला. संध्याकाळी घरी परतलो की आजी विचारायची – झाल्या का सगळ्या हंड्या फोडून का अजून बाकी आहेत?… आताच्या दहीहंडीत ती मजा नाही. हल्ली सगळं व्यावयासिक झालं आहे.
मंगळागौरीच्या खेळांची एक वेगळीच मजा होती. कुणाचे आमंत्रण आले की भारी आनंद व्हायचा, मंगळागौरीचे खेळ खेळायला मिळणार म्हणून. तिकडच्या आजीच्या ( आईची आई) बिल्डींगच्या गच्चीत मी, नीता मावशी, भावना मावशी आणि त्यांच्या मैत्रिणी आम्ही सगळ्या मिळून फुगड्या, दंड फुगडी, बस फुगडी, कोंबडा … रोजच खेळ खेळायचो. किती त्या गमतीजमती आणि किती त्या आठवणी ….
श्रावणी सोमवार, मंगळागौर, श्रावणी शुक्रवार, पिठोरी अमावस्या… कहाणी संग्रहाचे एक एक पान उलगडता एक एक आठवण फेर धरून नाचू लागली डोळ्यांसमोर. साध्यासुध्या कहाण्या पण त्यातून बोध घेण्यासारखे खूप काही. आठवणींच्या रूपाने कहाणी संग्रहातील गोष्ट पुन्हा नव्याने वाचू लागले . एक आटपाट नगर होतं…
पूर्णिमा नार्वेकर
पुष्पक अपार्टमेंट, ब्लॉक नं 203,
भिकाजी लाड मार्ग,
दहिसर फाटक जवळ,
दहिसर (प.),
मुंबई – 400068