मुंबई, दि. २१ नोव्हेंबर – हे कर्मचाऱ्यांचे उत्स्फूर्त आंदोलन आहे. एसटी कर्मचारी कुठल्याही परिस्थितीत न्याय मिळविल्याशिवाय राहणार नाहीत. जे एसटी कर्मचारी आझाद मैदानाकडे येत आहेत त्यांना अडवू नका, सोडून द्या. ही दडपशाही योग्य नव्हे. कोणत्याही प्रकारचे दबावतंत्र वापरू नका. आज शांततामय मार्गाने, लोकशाही मार्गाने आंदोलन चालले आहे. उद्या जर का या आंदोलनाला हिंसक वळण लागले तर याला सरकार जबाबदार असेल, असा इशारा विधान परिषदेचे विरोधी पक्षनेते प्रविण दरेकर यांनी दिला. तसेच तुम्ही कितीही दबावशाही करा, एसटी कर्मचारी न्याय मिळवल्याशिवाय राहणार नाहीत, असा विश्वास दरेकर यांनी व्यक्त केला.
प्रसारमध्यमांशी बोलताना दरेकर म्हणाले की, एसटी कर्मचाऱ्यांचे आंदोलन मोठया प्रमाणावर दाबण्याचा सरकारचा प्रयत्न सुरू आहे. रात्री यवतमाळ आगारातून वणी, पांढर कवडा आणि औरंगाबाद विभागातून साधारण पाच गाड्या घोटीला अडवण्यात आल्या. त्यांचे मोबाइल काढून घेतले. ४० कर्मचाऱ्यांना रात्रभर डांबून ठेवले. अशा प्रकारची वागणूक दिली. आजही ते घोटी येथे पोलिसांच्या ताब्यात आहेत. मी स्वतः रात्री एसपी पाटील यांच्याशी बोललो. त्यांनी यात लक्ष घालण्यास सांगितले. परंतु या क्षणापर्यंत त्यांना सोडलेले नाही. अशा प्रकारची सरकारची मुस्कटदाबी सर्व ठिकाणी सुरू आहे.