अमित शहांसह भाजपच्या इतर नेत्यांविरोधातही तक्रार
बंगलोर-काँग्रेसने गुरुवारी बेंगळुरूत केंद्रीय गृहमंत्री अमित शहा यांच्याविरोधात एफआयआर दाखल केला. त्यात अमित शहा यांच्यावर प्रक्षोभक विधाने करणे, द्वेष पसरवणे व विरोधकांची प्रतिमा डागाळण्याचा ठपका ठेवण्यात आला आहे. अमित शहा यांनी कर्नाटकातील एका सभेत राज्यात काँग्रेसची सत्ता आल्यास जातीय दंगली होतील, असे विधान केले होते. काँग्रेसने त्यांच्या याच विधानाप्रकरणी ही तक्रार दाखल केली आहे.
काँग्रेस नेते रणदीप सिंग सुरजेवाला, डॉ. परमेश्वरा व कर्नाटकचे काँग्रेस प्रदेशाध्यक्ष डी के शिवकुमार यांनी बंगळुरू येथील हाय ग्राउंड पोलिस ठाण्यात अमित शहांविरोधात तक्रार दाखल केली आहे. अमित शहा यांच्याशिवाय भाजपच्या इतर बड्या नेत्यांसह विजयपुरा रॅलीचे आयोजन करणाऱ्या कार्यकर्त्यांचेही या प्रकरणी नाव घेण्यात आले आहे.
डीके शिवकुमार म्हणाले की, अमित शहा अशी कशी विधाने करू शकतात. याप्रकरणी आम्ही निवडणूक आयोगाकडे तक्रार केली आहे. दुसरीकडे, काँग्रेस अध्यक्ष मल्लिकार्जुन खरगे यांनीही एका जाहीर सभेत शहा यांच्या वक्तव्यावर टीका केली आहे.
काँग्रेसने आपल्या तक्रारीत म्हटले आहे की, अमित शहा यांचे भाषण खोट्या दाव्यांनी भरलेले होते. खोटे व निराधार आरोप करून काँग्रेस पक्षाची प्रतिमा मलिन करणे हा त्यामागील उद्देश होता. शहा यांना या माध्यमातून रॅलीत सहभागी झालेले लोक व इतर व्यासपीठांवरून भाषण पाहणाऱ्यांत जातीय विसंवादाचे वातावरण निर्माण करायचे होते.
शहा यांच्या भाषणाचा व्हिडिओही तक्रारीसोबत जोडण्यात आला आहे. एफआयआरमध्ये कलम 153, 505(2), 171G व 120B चा उल्लेख आहे.