पुणे-लोकसभेच्या निवडणुकीनंतर जर अस्थिरतेची परिस्थिती निर्माण झाली तर राष्ट्रवादीचे अध्यक्ष शरद पवार हे नरेंद्र मोदींनाही पाठिंबा देऊ शकतात असं मत ज्येष्ठ पत्रकार संजय भोकरे यांनी व्यक्त केलं. पवारांना दोनही पर्याय खुले असून ते NDA किंवा UPAला पाठिंबा देऊन मानाचं पद मिळवतील हे नक्की असंही ते म्हणाले. न्यूज18 लोकमतच्या बेधडक या चर्चेच्या कार्यक्रमात ते बोलत होते.
या कार्यक्रमात राजकीय विश्लेषक भरतकुमार राऊत, ज्येष्ठ पत्रकार संजय भोकरे, राष्ट्रवादीच्या प्रवक्त्या विद्या चव्हाण, भाजपचे प्रवक्ते केशव उपाध्ये आणि काँग्रेसचे प्रवक्ते यांनी सहभाग घेतला.
राष्ट्रवादीचे खासदार आणि प्रवक्ते माजीद मेमन यांनी गरज पडली तर शरद पवार पंतप्रधान व्हायला तयार आहेत असं मत व्यक्त केलं होतं. त्यानंतर पुन्हा एकदा राजकीय चर्चेला सुरुवात झाली आहे. आघाडीचं सरकार तयार करण्याची वेळ आली तर शरद पवार मुत्सद्देगिरीच्या बळावर डाव टाकतील असंही ते म्हणाले.