शरद पवार यांना आव्हान
पुणे–राजकारणातले गुरु ..शरद पवार असल्याचे सांगणारे पंतप्रधान नरेंद्र मोडी यांनी आता थेट बारामतीवरदेखील चाल करण्यासाठी व्यूहरचना केली आहे . पंतप्रधान नरेंद्र मोदी हे बुधवारी (दि.23) बारामती लोकसभा मतदार संघातील बूथ प्रमुखांशी व्हिडिओ कॉन्फरन्सद्वारे संवाद साधणार असल्याचे भाजपाचे बारामती लोकसभा मतदार संघाचे विस्तारक शिवाजीराव भुजबळ यांनी येथील पत्रकार परिषदेत सांगितले. लोकसभा निवडणुकीच्या पार्श्वभूमीवर एकंदरीत पंतप्रधान नरेंद्र मोदी यांनी थेट बारामती लोकसभा मतदारसंघातील कार्यकर्त्यांशी संपर्क साधून शरद पवारांना त्यांच्याच होमपीचमध्ये बाद करण्याचा डाव आखला असून राष्ट्रवादी कॉंग्रेसला थेट आव्हान दिले असल्याचे यावरून दिसून येत आहे.
यावेळी किसान मोर्चाचे प्रदेश उपाध्यक्ष वासुदेव काळे, भाजपा जिल्हा सरचिटणीस तानाजीराव दिवेकर, भाजपा सोशल मिडिया जिल्हाध्यक्ष धीरज भळगट, तालुकाध्यक्ष गणेश आखाडे उपस्थित होते. भुजबळ म्हणाले की, लोकसभा निवडणुकीच्या पार्श्वभुमीवर नरेंद्र मोदी हे राज्यात बारामती लोकसभा मतदार संघातील बूथ प्रमुखांशी प्रथमतः व्हिडिओ कॉन्फरन्सद्वारे सवांद साधत असल्याने कार्यकर्त्यांमध्ये उत्सुकता निर्माण झाली आहे. हा व्हिडिओ कॉन्फरन्सचा कार्यक्रम बारामती येथे बुधवारी (दि.23) दुपारी 03:00 वाजता होणार असून या कार्यक्रमाला लोकसभा मतदार संघातील जवळपास 2070 बूथ प्रमुख उपस्थित राहणार असल्याचे भुजबळ यांनी सांगितले.
लोकसभा 2014च्या निवडणुकीत बारामती मतदारसंघ भाजपाचा मित्र पक्ष असलेल्या रासपला देण्यात आला होता. त्यावेळी रासपच्या महादेव जानकर यांनी ही निवडणूक लढवली होती. जानकर यांनी राष्ट्रवादीच्या सुप्रिया सुळे यांच्यापुढे कडवे आव्हान दिले होते. मात्र, त्यावेळी महादेव जानकर यांचा पराभव झाला होता. त्यावेळी जानकर यांनी कमळ चिन्हावर निवडणूक लढली असती तर त्यावेळचे चित्र वेगळे असते. त्यामुळे आताच्या लोकसभा निवडणुकीत कोणत्याही परिस्थितीत भाजपाचे कमळ चिन्ह असलेला उमेदवार देण्यात येणार आहे, अशी माहिती भुजबळ यांनी दिली. राष्ट्रवादी कॉंग्रेसच्यावतीने खासदार सुप्रिया सुळे यांचे नाव निश्चित असून भाजपाच्या वतीने सुळे विरोधात कोण उमेदवार असणार याची उत्सुकता निर्माण झाली आहे.