चंद्रकांत दादा पाटील 1 लाख 15 हजार मतांनी विजयी होतील -खासदार संजय काकडे यांना विश्वास
पुणे : भाजपाचे प्रदेशाध्यक्ष चंद्रकांत दादा पाटील कोथरुड विधानसभा मतदार संघातून निवडणूक लढवत असून त्यांच्या विजयाची फक्त औपचारिकता बाकी आहे. कोथरुड हा भाजपाचा बालेकिल्ला आहे आणि चंद्रकांत दादा पाटील येथून 1 लाख 15 हजार मतांनी विजयी होतील, असा विश्वास भाजपचे सहयोगी सदस्य व राज्यसभा खासदार संजय काकडे यांनी आज व्यक्त केला.
भाजपाचे प्रदेशाध्यक्ष चंद्रकांत दादा पाटील यांना कोथरुड विधानसभा मतदार संघातून उमेदवारी जाहीर झाल्यानंतर आज कार्यकर्ता मेळाव्याचे आयोजन करण्यात आले होते. यावेळी खासदार संजय काकडे बोलत होते. याप्रसंगी प्रदेशाध्यक्ष चंद्रकांत दादा पाटील, खासदार गिरीश बापट, माजी मंत्री शशिकांतभाऊ सुतार, योगेश गोगावले, शहराध्यक्ष माधुरी मिसाळ, आमदार मेधा कुलकर्णी, मुरलीधर मोहोळ आदी मान्यवर उपस्थित होते.
चंद्रकांत दादा पाटील यांचा पुणे शहराशी गेेल्या 40 वर्षांंपासून संबंध आहे आणि पुणे पदवीधर मतदार संघाचे ते गेली 12 वर्षे प्रतिनिधित्व करीत आहेत. पुुणे जिल्ह्याचे पालकमंत्री म्हणूनही त्यांनी सहा महिने काम केले आहे. त्यामुळे ते बाहेरून आलेत असा आरोप अत्यंत चुकीचा आहे. चंद्रकांत दादा पाटील यांच्या उमेदवारीचा मला वैयक्तिक खूप आनंद आहे. फक्त कोथरुडच नाही तर, संपूर्ण पुणे जिल्ह्याला चंद्रकांत दादांकडून अपेक्षा आहेत, असेही खासदार काकडे म्हणाले.
विरोधकांना आता प्रचारासाठी मुद्दे नाहीत. त्यामुळे ते काहीही आरोप करीत आहेत व पुढेही करतील. परंतु, आपला प्रत्येक कार्यकर्ता घराघरात पोहचेल आणि नुकत्याच झालेल्या लोकसभा निवडणुकीत कोथरुड मधून खासदार गिरीश बापट यांना मिळालेल्या मताधिक्यापेक्षा अधिक मताधिक्य आपणांस मिळवून देऊ. कोथरुड विधानसभा मतदार संघातून लोकसभा निवडणुकीत गिरीश बापट यांना 1 लाख 9 हजार मताधिक्य मिळाले आहे. आता त्यात वाढ होईल व चंद्रकांत दादांना 1 लाख 15 हजार मताधिक्य मिळेल, असे खासदार संजय काकडे यांनी सांगितले.