क्लबच्या 6वर्षांनंतर ताम्हाणे नव्या भूमिकेत रुजू
बंगळुरु: पुण्याचे नामांकित क्रीडा संघटक मंदार ताम्हाणे यांची बंगळुरु एफसी संघाच्या मुख्य कार्यकारी अधिकारी पदावर नियुक्ती करण्यात आल्याचे बंगळुरु फुटबॉल क्लबने आज जाहीर केले. संघाचे मुख्य तांत्रिक अधिकारी म्हणून कार्यभार स्वीकारल्यानंतर 6 वर्षांनी ताम्हाणे नव्या भूमिकेत रुजू होत आहेत. या नव्या पदावर असताना ताम्हाणे यांच्याकडे क्लबच्या तांत्रिक, बिगर तांत्रिक, आर्थिक, दैनंदिन कामकाज आणि प्रशासन अशा सर्व जबाबदाऱ्या असणार आहेत.
यावेळी बोलताना बंगळुरु एफसीचे संचालक पार्थ जिंदाल म्हणाले कि, जेएसडब्लू समूहाने नेहमीच अंतर्गत अधिकर्यांपैकी गुणवान अधिकाऱ्यांना त्यांच्या नियमित जबाबदाऱ्यापेक्षा मोठ्या पदावर संधी देण्याचे आणि नवनवीन आव्हाने स्वीकारण्याचे धोरण स्वीकारले आहे. मंदार ताम्हाणे यांनी बजावलेल्या उत्तम कामगिरीमुळे बंगळुरु एफसीने जी दैदिप्यमान कामगिरी बजावली. त्यामुळे क्लबचे मुख्य कार्यकारी अधिकारी म्हणून त्यांना पदोन्नती देताना मला अत्यंत आनंद होत आहे.
मंदार ताम्हाणे यांनी याआधी भारताच्या राष्ट्रीय फुटबॉल संघाचे व्यवस्थापक म्हणून प्रशंसनीय कामगिरी पार पाडली होती. तसेच, बंगळुरु एफसीच्या स्थापने (2013)पासून गेली 6 वर्षे ते क्लबच्या विविध जबाबदाऱ्या सांभाळत आहेत.
यावेळी बोलताना मंदार ताम्हाणे म्हणाले कि, बंगळुरु एफसीच्या मुख्य कार्यकारी अधिकारीपदी नियुक्ती होणे हा माझ्यासाठी मोठा बहुमान आहे आणि माझ्या क्षमतेवर विश्वास ठेवून आणखी चांगली कामगिरी करण्यासाठी मला संधी दिल्याबद्दल मी क्लबच्या व्यवस्थापनाचा अत्यंत आभारी आहे. या नियुक्तीमुळे माझ्या नावामागे एका नव्या पदाची नोंद होणार असली, तरी क्लबच्या प्रगतीसाठी माझे प्रयत्न आणि निष्ठा 2013पासूनच्या प्रवासाप्रमाणे कायम राहणार आहेत. मी बंगळुरु एफसीमध्ये विलक्षण क्षमतेच्या सहकार्यांसोबत काम करत असून त्यांनी क्लबच्या यशासाठी माझ्याबरोबर मोलाचा वाटा उचलला आहे. केवळ क्लबच्याच नव्हे तर भारतीय फुटबॉलच्या उज्वल भवितव्यासाठी माझे प्रयत्न यापुढेही कायम राहतील, असे मी आश्वासन देतो.