मुंबई- आज सकाळी राष्ट्रवादी काँग्रेसचे अध्यक्ष शरद पवार यांनी मुंबईतल्या ब्रीच कँडी रुग्णालयातून डिस्चार्ज देण्यात आला आहे. ते आता सिल्वर ओक या निवासस्थानी दाखल झालेत.पवारांवर गेल्या आठ दिवसांपासून उपचार सुरू होते. याच काळात त्यांनी शिर्डीतल्या अधिवेशनालाही हजेरी लावली. मात्र, त्यांचे भाषण दिलीप वळसे-पाटील यांनी वाचून दाखवले.
पवार यांच्यावर गेल्यावर्षी मार्चमध्ये ब्रीच कँडी रुग्णालयात शस्त्रक्रिया करण्यात आली होती. मात्र, पोटदुखीमुळे त्यांना मंगळवारी रात्री ब्रीच कँडी रुग्णालयात दाखल करण्यात आले होते. त्यानंतर त्यांच्या पित्ताशयात खडे झाल्याचे समोर आले. एन्डोस्कोपीद्वारे पित्ताशयातील खडे काढून टाकण्यात आले. मात्र, अजून त्यांच्या प्रकृतीत म्हणावी तशी सुधारणा झाली नव्हती. याच काळात त्यांनी शिर्डी येथील राष्ट्रवादी काँग्रेसच्या मंथन शिबिरालाही हजेरी लावली. मात्र, तिथेही त्यांनी अवघ्या चार-पाच मिनिटांत भाषण संपवले. पुन्हा त्यांचे भाषण दिलीप वळसे-पाटील यांनी वाचून दाखवले. या शिबिरातून ते पुन्हा ब्रीड कँडीमध्ये दाखल झाले. आत आज त्यांना डिस्चार्ज देण्यात आला आहे.