मुंबई-बडतर्फ पोलीस अधिकारी सचिन वाझेला मोठा दिलासा मिळाला आहे. मुंबई सत्र न्यायालयाने वाझेला मनी लाँड्रिंग प्रकरणात जामीन मंजूर केला आहे. मात्र, वाझेला जामीन मंजूर झाला असला तरी त्यांना इतर प्रकरणांमुळे जेलमधून सुटका होणार नाही.
ईडीने वाझेला जामीन देण्यास नकार दिला होता. मात्र न्यायलयाने हा विरोध फेटाळला आणि वाझेला जामीन दिला आहे. वाझेच्या जामीनावर 15 नोव्हेंबरला सुनावणी पूर्ण झाली होती. त्यानुसार आज 18 नोव्हेंबरला निकाल लागणार होता. ईडीने वाझेवर गुन्हा दाखल केला होता.
वाझेने सीआरपीसी सीआरपीसी कलम 88 नुसार जामीन मिळावा, यासाठी अर्ज केला होता. मात्र ईडीने या जामीनासाठी विरोध केला. मात्र आज अखेर न्यायालयाने वाझेच्या बाजूने निर्णय देत त्याला मोठा दिलासा दिला.
सहा महिन्यांपूर्वी 100 कोटी रुपयांच्या वसुली प्रकरणात बडतर्फ पोलिस अधिकारी सचिन वाझेला विशेष सीबीआय न्यायालयाने सरकारी साक्षीदार होण्यास परवानगी दिली होती. अटकेपूर्वी आणि नंतरही आपण सीबीआयला सहकार्य केल्याचे वाझे याने न्यायालयाला सांगितले होते. त्यानंतर न्यायदंडाधिकाऱ्यांसमोर त्याचा जबाब नोंदवला आणि बीआय न्यायालयाने काही अटींसह वाझेला दिलासा दिला. याबाबत सचिन वाझे याने मुंबई सत्र न्यायालयात दाखल केलेल्या अर्जाला मंजुरी देण्यात आली होती. आपल्याला माफीचा साक्षीदार बनवावे असा अर्ज वाझेंनी मुंबई सत्र न्यायालयात केला होता.
काय आहे प्रकरण?
सचिन वाझेला गेल्या वर्षी मार्चमध्ये मनसुख हिरेन खून प्रकरण आणि दक्षिण मुंबईतील उद्योगपती मुकेश अंबानी यांच्या निवासस्थानाजवळ स्फोटकांनी भरलेले वाहन याप्रकरणी अटक करण्यात आली होती. वाझे सध्या न्यायालयीन कोठडीत आहेत.
गेल्या वर्षी मार्चमध्ये मुंबईचे माजी पोलिस आयुक्त परमबीर सिंग यांनी आरोप केला होता की, महाराष्ट्राचे तत्कालीन गृहमंत्री अनिल देशमुख यांनी पोलिस अधिकाऱ्यांना महानगरातील रेस्टॉरंट आणि बारमधून दरमहा 100 कोटी रुपये गोळा करण्याचे टार्गेट दिले होते. मुंबई उच्च न्यायालयाच्या आदेशानंतर सीबीआयने गेल्या एप्रिलमध्ये देशमुख, वाझे आणि इतरांविरुद्ध एफआयआर नोंदवला होता. उच्च न्यायालयाच्या आदेशानंतर राष्ट्रवादीचे नेते देशमुख यांनी राज्य मंत्रिमंडळाचा राजीनामा दिला होता.
कोण आहेत सचिन वाझे?
सचिन वाझे हे 1990 च्या बॅचमधील पीएसआय आहेत. वाझेंच्या नावावर 63 एन्काउंटर आहेत. बॉम्ब स्फोट आरोपी ख्वाजा युनूसचा मृत्युमुळे वादात अडकले. युनूसचा 2004 मध्ये कोठडीत मृत्यू झाला. त्यामुळे वाझे यांना निलंबित करण्यात आलं. सरकारने वाझेंचा 2007 मध्ये नोकरीचा राजनीमा नाकारला. त्यानंतर वाझे यांनी 2008 मध्ये शिवसेनेत प्रवेश केला. वाझे जून 2020 मध्ये पुन्हा पोलीस सेवेत रुजु झाले.