तुळजापूर- तिरुपती नंतर तुळजाभवानी मंदिरात हाफ पॅन्ट, उत्तेजक आणि अंग प्रदर्शन करणारे कपडे घालणाऱ्या भाविकांना प्रवेश मिळणार नाही. तुळजाभवानी मंदिर संस्थानने एक नियमावली जारी केली आहे. त्यानुसार आज मंदिर परिसरात फलकही लावण्यात आलेत.उस्मानाबादचे जिल्हाधिकारी हे मंदिर समितीचे अध्यक्ष आहेत. भारतीय राज्य घटनेनुसार नागरिकांनी कोणते कपडे घालावेत, काय खावे, काय प्यावे याचे स्वातंत्र्य आहे. तरीही हा निर्णय घेतल्याबद्दल आश्चर्य व्यक्त होत आहे.
नवीन नियम काय?
तुळजाभवानी मंदिर परिसरात प्रवेश करण्यासाठी तुळजाभवानी मंदिर समितीने नवीन नियम केलेत. त्यानुसार हाफ पॅन्ट, शॉर्ट पॅन्ट घालणारे महिला व पुरुषांना मंदिरात प्रवेश मिळणार नाही. महिलांना वन पीस आणि शॉर्ट स्कर्ट घालून मंदिरात प्रवेश मिळणार नाही. या सूचना देणारे फलकही मंदिर परिसरात लावण्यात आलेत.
सभ्यता पाळा
मंदिर परिसरातल्या फलकावर म्हटले आहे की, अंग प्रदर्शक, उत्तेजक, असभ्य व अशोभनीय वस्त्रधारी तसेच हाफ पॅन्ट, बर्मुडाधारींना मंदिरात प्रवेश नाही. कृपया भारतीय संस्कृती आणि सभ्यतेचे भान ठेवा, असे आवाहन या संदेशातून करण्यात आले आहे. हा निर्णय घेतल्याबद्दल पुजारी वर्गाकडून मंदिर संस्थानचे व्यवस्थापक तथा तहसीलदार सौदागर तांदळे, सहाय्यक व्यवस्थापक नागेश शितोळे यांचा सत्कार करण्यात आला.
तुळजाभवानी मंदिरात दिवसेंदिवस भाविकांचा ओघ वाढतो आहे. त्यामुळे भाविकांनी दिलेले दानही वाढत चालले आहे. आता दानपेट्यांच्या लिलावाची पद्धत बंद झाल्यामुळे गेल्या 13 वर्षांत मंदिराचे रोख व सोन्या-चांदीच्या स्वरूपातील उत्पन्न तब्बल 10 पट वाढले आहे. 2010 मध्ये मंदिराकडे भाविकांनी वाहिलेले 21 किलो सोने होते. 13 वर्षांत यात सुमारे 187 किलोची भर पडली असून मंदिराकडे आता 208 किलो वाहिक सोने आणि 3 हजार 404 किलो चांदी आहे. रोख रकमेचे दानही वाढले असून देणग्या आणि एकूण उत्पन्नामुळे मंदिराकडे 40 कोटींवरून 240 कोटी 97 लाख,60 हजार रुपये जमा झाले आहेत. याशिवाय पुरातन काळापासून राजा-महाराजांनी मातेला वाहिलेले अमूल्य असे 7 पेट्या भरून दागिने मंदिराकडे आहेत.