पुणे: मर्सिडिज-बेंझ या भारतातील सर्वात मोठ्या लक्झरी कार उत्पादकाने कोल्हापूर, सांगली, वडोदरा, कालिकत, कोची आणि या शहरांतील आजूबाजूच्या परिसरांतील पुराने बाधित ग्राहकांसाठी तातडीने अनेक ग्राहक सेवा उपाय जाहीर केले आहेत. मर्सिडिज-बेंझ इंडियाने पूरग्रस्त शहरे व आजूबाजूचा परिसर येथी पुरामध्ये ज्या ग्राहकांच्या वाहनांचे नुकसान झाले आहे त्यांना मदत करण्यासाठी क्रॉस-फंक्शनल टास्क फोर्स सज्ज केले आहे. ही क्रॉस-फंक्शनल टीम प्रत्यक्षातील परिस्थितीचे बारकाईने मूल्यमापन करत आहे आणि ग्राहकांना मदत करण्यासाठी अल्प ते दीर्घ कालावधीसाठी आकस्मिक योजना आखत आहे. मर्सिडिज-बेंझ इंडियाने पश्चिम महाराष्ट्र, उत्तर कर्नाटक, केरळ आणि आजूबाजूचा परिसर येथील पूरग्रस्तांच्या मदतकार्यास हातभार लावण्यासाठी मुख्यमंत्र्यांच्या मदत निधीसाठी स्वेच्छेने 48.60 लाख रुपयांचे योगदान देण्याची घोषणा केली आहे.
मर्सिडिज–बेंझ इंडियाचे व्यवस्थापकीय संचालक व मुख्य कार्यकारी अधिकारी मार्टिन श्वेंक यांनी नमूद केले, “मुसळधार पाऊस आणि पूर यामुळे कोल्हापूर, सांगली, वडोदरा, उत्तर कर्नाटक, कालिकत व कोची येथे कमालीचे नुकसान होत असल्याने; मर्सिडिज-बेंझ इंडिया आणि या भागांतील आमचे डीलर पार्टनर यांनी बाधित ग्राहकांना कोणतीही सेवा व विमा या बाबतीत तातडीने मदत करण्याचा निर्णय घेतला आहे. पूरस्थितीमुळे अगोदरच अनेक आव्हानांना तोंड देत असणाऱ्या आमच्या ग्राहकांसाठी आम्ही मोफत टोइंग, स्पेअर पार्ट्सचा जलद पुरवठा, विम्याच्या दाव्यावर जलद प्रक्रिया आणि अन्य काही सेवा देणार आहोत. परिस्थिती हाताळण्यासाठी ग्राहक सेवा, वित्तीय सेवा व तांत्रिक सेवा यांचा समावेश असणारी, मर्सिडिज-बेंझ इंडिया, डीएफएस इंडिया व डीलर पार्टनर यांची क्रॉस-फंक्शनल टास्क फोर्स टीम तैनात करण्यात आली आहे. ही टीम प्रत्यक्षातील परिस्थितीची बारकाईने पाहणी करत आहे आणि मर्सिडिज-बेंझ ग्राहकांपर्यंत पोहोचून त्यांच्या वाहनांसाठी आवश्यक असलेली सर्व प्रकारची मदत देत आहे.”
श्वेंक म्हणाले, “या संकटाच्या क्षणी आम्ही यंत्रणांसोबत व अधिकाऱ्यांसोबत आहोत आणि एक जबाबदार कॉर्पोरेट सिटिझन या नात्याने, आम्हाला मदतकार्यामध्ये खारीचा वाटा उचलायचा आहे. मर्सिडिज-बेंझ इंडिया पश्चिम महाराष्ट्र, उत्तर कर्नाटक, केरळ आणि आजूबाजूचा परिसर येथील पूरग्रस्तांच्या मदतकार्यास हातभार लावण्यासाठी मुख्यमंत्र्यांच्या मदत निधीसाठी स्वेच्छेने 45 लाख रुपयांचे योगदान देणार आहे. सर्व परिस्थिती लवकरच पूर्ववत होईल, अशी आशा आहे.”
गाड्यांचे महत्त्वाचे भाग लवकर उपलब्ध करण्यासाठी, मर्सिडिज-बेंझ इंडियाने ग्राहकांवर अधिक खर्चाचा भार न टाकता, हे भाग जर्मनी व सिंगापूर लॉजिस्टिक्स सेंटर्स येथून एअरफ्रेटने मागवायचे ठरवले आहे. देशभरातील मर्सिडिज-बेंझ डीलर पार्टनर्सनी स्पेअर पार्ट उपलब्ध करण्यासाठी प्राधान्य देण्याचे आणि अतिरिक्त संसाधने देण्याचे मान्य केले आहे. यामुळे वेळेची बचत होईल आणि वाहनांच्या दुरुस्तीचा वेग वाढेल, तसेच जास्तीत जास्त वाहनांची दुरुस्ती केली जाईल.
त्याचबरोबर, मर्सिडिज-बेंझ ऑन-रोड असिस्टन्स टीम बाधित वाहने ताब्यात घेणार आहे, तसेच रिटेल नेटवर्क टीमनी ग्राहकांना मदत करण्याच्या हेतूने अतिरिक्त मनुष्यबळ उपलब्ध करायचे ठरवले आहे. ग्राहक-केंद्री दृष्टिकोन अंगिकारत, मर्सिडिज-बेंझने व कंपनीच्या भागीदारांनी कारसाठीच्या टोइंगचा खर्च स्वतः करण्याचा निर्णय घेतला आहे.
डॅमलर फिनान्शिअल सर्व्हिसेस इंडियाही इन्शुअर्ड कारच्या विम्यावर वेगाने प्रक्रिया करण्यासाठी सातत्याने प्रयत्नशील आहे. ग्राहकांसाठी विम्याच्या दाव्याची प्रक्रिया झटपट करून त्यांना मदत करण्याच्या हेतूने, डीएफएस इंडियाची टीम कारचे झालेले नुकसान, इंजिनाचे झालेले नुकसान व खरेदी केलेली विमा योजना यांचे मूल्यमापन करण्यासाठी प्रत्यक्ष भेटी देणार आहे.