मुंबई, दि. १६ मे – माझी किशोरी पेडणेकर यांच्याबरोबर प्रसारमाध्यमांसमोर चर्चा करण्याची तयारी आहे. देवेंद्रजींच्या नेतृत्वाखाली नागपूरचा सर्वांगीण विकास झाला, त्याउलट अनेक ठिकाणी मुंबई महापालिकेत विकासाच्या नावावर जो भ्रष्टाचार झाला, यावर चर्चा करण्याची तयारी आहे, असे खुले आव्हान विधान परिषदेचे विरोधी पक्षनेते प्रविण दरेकर यांनी माजी महापौर किशोरी पेडणकेर यांना दिले.
मुंबईची काळजी करू नका, नागपूर आणि पुण्यात भ्रष्टाचार जास्त आहे, तिथे जरा लक्ष द्या, असे वक्तव्य माजी महापौर किशोरी पेडणेकर यांनी केले आहे. त्यासंदर्भात प्रसारमाध्यमांशी विरोधी पक्षनेते प्रविण दरेकर बोलत होते. ते पुढे म्हणाले की, नागपूरमद्धे मागाहून सुरू झालेली मेट्रो चालू झाली. आणि मुंबईत देवेंद्रजींनी अंतिम टप्प्यात आणलेली मेट्रो तुम्ही सुरू करू शकला नाहीत. कारशेडचे आपण राजकारण केले. अहंकारातून भांडुपला नेले. पण कारशेड होऊ शकली नाही. अशा प्रकारच्या शेकडो गोष्टी आहेत, ज्या पंचवीस वर्षांच्या कारकिर्दीत आपल्याला करता आल्या नाहीत. म्हणून देवेंद्रजींनी मुंबईच्या विकासासाठी आपण जे भकास केलेय ते दुरुस्त करण्याची आणि लक्ष घालण्याची वेळ आली आहे. पाच वर्षाच्या कालावधीत मुंबईला प्रकल्पांचा विकास जो देवेंद्रजींनी दाखवला तो मुंबईकरांना माहीत आहे, असेही दरेकर यांनी सांगितले.