मुक्ता टिळक-लक्ष्मण जगताप यांच्या मृत्यूनंतर रिक्त जागांवर निवडणूक
पुणे-कसबा पेठ अन् पिंपरी चिंचवडची पोटनिवडणूक जाहीर झाली आहे. दोन्ही मतदारसंघातील पोटनिवडणुकीसाठी 27 फेब्रुवारीला मतदान पार पडणार आहे. तर 2 मार्च निकाल जाहीर होणार आहेत.
पुण्यातील कसबा पेठच्या भाजपच्या आमदार मुक्ता टिळक यांचे आणि चिंचवडचे आमदार लक्ष्मण जगताप यांचे निधन झाल्यानंतर या जागा रिक्त होत्या. आता या दोन्ही जागांसाठी पोटनिवडणूक जाहीर करण्यात आली आहे.
असा आहे निवडणूक कार्यक्रम
निवडणुकीची अधिसूचना जाहीर : 31 जानेवारी 2023
अर्ज दाखल करण्याची मुदत : 7 फेब्रुवारी 2023
अर्जांची छाननी : 8 फेब्रुवारी
अर्ज मागं घेण्याची मुदत : 10 फेब्रुवारी
मतदान : 27 फेब्रुवारी
निकाल : 2 मार्च
टिळक आणि जगतापांच्या निधनामुळे निवडणूक
भारतीय जनता पक्षाचे पिंपरी चिंचवड शहराचे माजी शहराध्यक्ष आणि चिंचवडचे आमदार लक्ष्मण जगताप (59) यांचे बाणेरमधील खासगी रुग्णालयात निधन झाले. या मतदारसंघातून सलग तीन वेळा ते आमदार म्हणून निवडून आले हाेते. नुकतेच पुण्यातील कसबा मतदारसंघातील भाजप आमदार मुक्ता टिळक यांचे निधन झाले होते.
जगताप तीन वर्षांपासून कर्करोगाने आजारी होते. गेल्या सहा महिन्यांपासून त्यांची प्रकृती खालवत गेली. मार्चच्या शेवटच्या आठवड्यात कुटुंबीयांनी उपचारासाठी त्यांना अमेरिकेत नेले होते. एप्रिल 2022 मध्ये ते पुन्हा मायदेशी परतले. काही दिवसांपूर्वी अस्वस्थ वाटू लागल्याने त्यांना बाणेर येथील ज्युपिटर हॉस्पिटलमध्ये दाखल करण्यात आले होते. नंतरच्या काळात त्यांची प्रकृती अधिक चिंताजनक झाली. डॉक्टरांनी अगदी शर्थीचे प्रयत्न केले, पण अखेर सर्व उपाय संपले आणि त्यांची प्राणज्योत मालवली. पिंपरी चिंचवड आणि कसबा मतदारसंघात कुणाला उमेदवारी देणार याकडे सर्वांचे लक्ष लागले आहे.
भारतीय जनता पक्षाच्या पुण्यातील कसबा विधानसभा मतदारसंघातील आमदार मुक्ता टिळक यांचे 22 नोव्हेंबर 2022 रोजी निधन झाले होते. मुक्ता टिळक या आमदार होण्यापूर्वी पुण्याच्या सन 2017 ते 19 या दरम्यान महापौर होत्या. कसबा विधानसभा मतदारसंघाचे अनेक वर्ष आमदार राहिलेले पुण्याचे विद्यमान खासदार गिरीश बापट यांच्या रिक्त जागेवर मुक्ता टिळक यांची वर्णी लागली होती. त्यानंतर बापट यांच्यासह भाजप पदाधिकाऱ्यांनी टिळक यांना कसबा विधानसभा मतदारसंघातून निवडून आणण्यासाठी मोठ्या प्रमाणात प्रयत्न केले होते. त्यांच्या निधनानंतर आता या मतदारसंघातून भाजप कुणाला उमेदवारी देणार याकडे सर्वांचे लक्ष लागले आहे.