मुंबई: मुंबईत दारूच्या दुकानांबाहेर झालेली गर्दी लक्षात घेऊन पालिका आयुक्त प्रवीण परदेशी यांनी आपल्या विशेषाधिकारात कठोर निर्णय घेतला आहे. मुंबईत उद्यापासून दारूची दुकाने पुन्हा बंद ठेवण्याचे आदेश पालिका आयुक्तांनी काढले आहेत. जीवनावश्यक वस्तू व औषधांची दुकाने सोडून मुंबईत इतर कोणतेही दुकान उघडण्यास मनाई राहिल, असे पालिका आयुक्तांनी आपल्या आदेशात नमूद केले आहे.करोनाचा सर्वाधिक प्रादुर्भाव मुंबईत आहे. असे असताना मुंबईतील कंटेंटमेंट झोन वगळून इतर भागात केंद्र सरकारचे दिशानिर्देश व राज्य सरकारच्या सूचनांनुसार काही अटींवर दारूची दुकाने व इतर दुकाने उघडण्यास परवानगी देण्यात आली होती. मात्र, ही परवानगी मिळताच मुंबईत प्रामुख्याने विविध वाइन शॉपबाहेर मोठी गर्दी उसळल्याचे पाहायला मिळाले. मुंबईतील विविध भागांत दारूच्या दुकानांबाहेर मद्यप्रेमींनी रांगा लावल्या. त्यात फिजिकल डिस्टन्सिंगचेही भान राखले गेले नाही. ही बाब गांभीर्याने घेत पालिका आयुक्तांनी कठोर पाऊल उचलले आहे.