(लंडन)-मेल ऑनलाईन ने दिलेल्या वृत्तानुसार ब्रिटनच्या वैज्ञानिकांनी ग्रॅफिनद्वारे एक पदार्थ विकसित केला आहे. या पदार्थाच्या वापराने रस्त्यांना तडे जाणार नाहीत. याचा वापर केल्याने आता रस्त्यांवर खड्डे पडणार नाहीत आणि अपघात कमी होतील.असा दावा करण्यात येतो आहे . ग्रॅफिन एक विशिष्ट प्रकारचे कार्बन आहे, जो जगातील सर्वात मजबूत पदार्थ आहे. इंग्लंडमधील ऑक्सफोर्डशायर येथील रस्ता तयार करण्यासाठी प्रायोगिक तत्त्वावर या ग्रॅफिनचा वापर केला जात आहे. हा रस्ता १० दिवसांत तयार होईल. रस्ता तयार झाल्यानंतर अवजड वाहने आणि हवामानाचा यावर काय परिणाम होतो याचे परीक्षण केले जाईल. जास्त उष्णतेने हा पदार्थ वितळत नाही, चिकटत नाही तसेच थंडीत याला तडे पडत नाहीत, हे या पदार्थाचे वैशिष्ट्य आहे. या पदार्थाचा शोध २००४ मध्ये मँचेस्टर विद्यापीठातील संशोधकांनी लावला होता. वैज्ञानिकांच्या मते, ग्रॅफिनच्या मिश्रणातून तयार झालेला हा पदार्थ रस्त्यांसाठी वापरात येणाऱ्या पदार्थाच्या तुलनेत २० टक्क्यांनी महाग आहे, मात्र दीर्घकाळ टिकाऊ असल्याने हा स्वस्त राहील. याशिवाय मोठ्या प्रमाणात उत्पादन केल्यास त्याचा खर्च आणखी कमी होण्याची अाशा आहे. ग्रॅफिनचा वापर एक वर्षापूर्वी इटलीची राजधानी रोम येथील बाह्य भागातील रस्त्यासाठी केला होता. येथे कडक ऊन आणि कडाक्याची थंडी असताना या रस्त्यावरून वर्षभर वाहनांची ये-जा होऊनदेखील रस्ता ना वितळला ना त्याला तडे गेले. रस्ता तयार करताना ग्रॅफिन या कार्बन संयुगाचा पहिला स्तर असतो, ज्याची बांधणी जाळीदार असते. हे सर्वसाधारण कार्बनपेक्षा २०० पट मजबूत असून त्यामुळे रस्त्याला तडे जात नाहीत.
ऑक्सफोर्डशायर येथील ग्रॅफिन रस्त्यासाठी वापरण्यात येणारे डांबर इटलीतील डायरेक्टा प्लस आणि इटरचिमिका या दोन कंपन्या विकसित करत आहेत. याचा खर्चही या कंपन्यांत करत आहेत.