पुणे- खड्डे बुजविण्यासाठी कोट्यावधींची टेंडर प्रक्रिया राबविली जाते मग तरीही पुणे शहर खड्ड्याचा त्रास का सहन करत आहे , का हे शहरच खड्डेमय दिसत आहे ? असे सवाल करत महापालिका प्रशासनाच्या कारभारावर कॉंग्रेसचे ज्येष्ठ नगरसेवक आणि महापालिकेतील गटनेते आबा बागुल यांनी ताशेरे ओढले आहेत .
बागुल या संदर्भात म्हणाले ,’ पुणे महानगरपालिकेकडून शहरातील रस्त्यांची कामे तांत्रिकदृष्टया योग्य न झाल्याने तसेच रस्ते खोदाई नंतर रिईनस्टेटची कामे देखील अर्धवट व निकृष्ट केल्याने शहरात अनेक ठिकाणी खडडे पडले आहेत. खडडे बुजविण्यासाठी कोटयावधींचे टेंडर काढले असूनही शहर खडडयात आहे. वास्तविक पुणे महानगरपालिकेकडून रस्ते विकसित करताना रस्ता खराब झाल्यास संबंधित ठेकेदाराने पुन्हा पूर्ववत करावा यासाठी डिफेक्ट लायबिलिटी पिरियड निश्चित केलेला असतो. असे असतानाही प्रशासनाकडून डिफेक्ट लायबिलिटी पिरियड मधील रस्त्यांवरील खडडे बुजविणेचे काम केले जात असून ठेकेदारांना पाठीशी घालण्याचे काम प्रशासनाकडून होत आहे. रस्ते खोदाई नंतर रिईनस्टेट देखील चुकीच्या पध्दतीने म्हणजेच डांबरी रस्त्यावर काँक्रीटने रिईनस्टेट केले जाते. अधिकारी व ठेकेदार यांचे संगनमत असल्याने रस्त्यांवर खडडे पडूनही याकडे जाणीवपूर्वक दुर्लक्ष केले जात आहे.
एकीकडे सत्ताधारी पक्षाकडून पुणे शहर स्मार्ट झाले आहे अशा घोषणा केल्या जातात व प्रत्यक्षात मात्र शहर खडडयात गेले आहे. तरी काँग्रेस पक्षाच्या वतीने मागणी करतो की, शहरातील सर्व खडडे तातडीने बुजविण्यात यावेत व संबंधित अधिकारी यांनी रस्त्यांची कामे तांत्रिकदृष्टया न तपासल्याने त्यांचेवर कर्तव्यात कसूर केल्याबाबत कारवाई करण्यात यावी अशी मागणी आबा बागुल यांनी केली आहे.