बारामती- काँग्रेसचे नेते अजित पवार यांचा गड असलेल्या बारामतीत भाजपला शिरकाव करायचा होता. पण, त्यांचा हा प्रयत्न अपयशी ठरला आहे. अजित पवारांनी भाजपचे आव्हान मोडीत काढत मोठा विजय मिळवला. एवढच नाही तर, अजित पवारांच्याविरोधातील गोपीचंद पडळकरांसोबत सर्वच उमेदवारांचे डिपॉझिट देखील जप्त झाले आहे. निवडणुकीत अजित पवारांना तब्बल 182200 मते मिळाली, तर गोपीचंद पडळकरांना 27404 मते मिळाली.
भाजपने अजित पवारांना त्यांच्या गडामध्ये घेरण्याचा प्रयत्न केला होता. प्रदेशाध्यक्ष चंद्रकांत पाटील यांच्यासह भाजपच्या अनेक नेत्यांनी अजित पवारांचा पराभव करणार असल्याचे विधान केले होते. त्यानंतर अजित पवारांनीही हे आव्हान स्वीकारत चंद्रकांत पाटलांसह सर्वांचेच बारामतीत लढण्यासाठी स्वागत केले होते. तसेच बारामतीतून 1 लाख मताधिक्याने निवडून येणार असल्याचा विश्वास अजित पवारांनी व्यक्त केला होता. तो या निकालातून खरा ठरला आहे.