विधानसभा निवडणुकीत पुण्यातील प्रतिष्ठेच्या शिवाजीनगर मतदार संघामधून महायुतीचा उमेदवार म्हणून मला संधी दिल्याबद्दल मी राज्याचे मुख्यमंत्री देवेंद्र फडणवीस आणि प्रदेशाध्यक्ष चंद्रकांत पाटील यांचा आभारी आहे. याबरोबरच माझ्यावर विश्वास ठेवत मला विजयी करणा-या मतदारांचे, पक्ष पदाधिकारी व कार्यकर्ते यांचे देखील मी आभार मानतो.आमदार म्हणून या पुढील काळात शिवाजीनगर मतदार संघातील मूलभूत प्रश्न सोडविण्यासाठी मी कटिबद्ध आहे. याशिवाय पक्षाच्या ध्येय धोरणांना अनुसरून असलेला माझा शिवाजीनगर मतदार संघाचा विकासाचा ‘निर्धारनामा’ राबविण्यासाठी देखील मी प्रयत्नशील असेल.
युवा आणि अभ्यासू चेहरा म्हणून सर्वांच्याच परिचयाचे असलेले सिद्धार्थ शिरोळे हे आता शिवाजीनगर मतदार संघाचे आमदार म्हणून ओळखले जाणार आहेत. चाळीस वर्षांचे सिद्धार्थ शिरोळे यांचे शालेय शिक्षण हे मॉडेल कॉलनी मधील विद्याभवन शाळेमधून झाले असून त्यांनी फर्गसन महाविद्यालयामधून ११ वी आणि १२ वी विज्ञान शाखेचा अभ्यासक्रम पूर्ण केला आहे. यानंतर एआयएसएसएमएस कॉलेज ऑफ इंजिनिअरिंग मधून त्यांनी बी. ई मेकॅनिकलची पदवी घेतली आहे.आपल्या वडिलांचा हॉटेलचा व्यवसाय पुढे नेत शहरातील प्रसिद्ध हॉटेल म्हणून नावाजलेल्या शबरी या हॉटेलचे व्यवस्थापन त्यांनी यशस्वीपणे सांभाळले आहे. यानंतर त्यांनी स्वत: शर्वरी हे रेस्टॉरंट देखील सुरु केले. मात्र व्यवसायापेक्षा आपला कल हा समाजकारणात आहे हे लक्षात आल्यानंतर त्यांनी पूर्णवेळ समाजकारण आणि राजकारणात काम करण्याचा निर्णय घेतला. यामधून २०१७ साली झालेल्या पुणे महानगरपालिकेच्या निवडणुकीत डेक्कन – मॉडेल कॉलनी प्रभागातून नगरसेवक म्हणून ते निवडून आले आहेत. यानंतर पीएमपीएमएलचे संचालक म्हणूनही त्यांनी आपली वेगळी ओळख निर्माण केली आहे. पुणे शहराचे माजी खासदार अनिल शिरोळे यांचे ते सुपुत्र आहेतच याबरोबर महाराष्ट्र हॉकी असोसिएशनचे उपाध्यक्ष म्हणूनही त्यांनी काम पहिले आहे. अमेरिकी सरकारच्या प्रतिष्ठेच्या इंटरनॅशनल व्हिजिटर लीडरशिप प्रोग्रॅममध्ये देखील सिद्धार्थ शिरोळे सहभागी झाले होते.
स्वयंभू फाउंडेशनच्या माध्यमातून कला, क्रीडा क्षेत्रातही ते कार्यरत असून लेखन, प्रवास, छायाचित्रण, संगीत हे त्यांचे आवडते छंद आहेत. ते स्वत: आशावादी असून नुकतेच त्यांनी इंग्रजी भाषेत ‘टू डे इज माय फेव्हारेट डे’ हे पुस्तकही लिहिले आहे. या पुस्तकाचे मराठीत देखील भाषांतर झाले असून हे पुस्तक वाचकांना एक सकारात्मक दृष्टी देते.
नगरसेवक म्हणून काम करीत असताना डेक्कन – मॉडेल कॉलनी प्रभागातील वाहतूक प्रश्न, कचराप्रश्न सोडविण्यावर त्यांनी भर दिला आहे. याशिवाय पीएमपीएमएलचे संचालक म्हणून त्यांनी तेजस्विनी बस सेवा आणि इलेक्ट्रिक बस सेवा यांवर भर देत शहराच्या सार्वजनिक वाहतुकीचा प्रश्न सोडविण्यासाठी प्रयत्न केले.
मुळात सिद्धार्थ शिरोळे यांचा स्वभाव हा आशावादी असून कोणत्याही प्रश्न सोडविण्यासाठी पूर्ण ताकदीने प्रामाणिक प्रयत्न करण्याची त्यांची तयारी असते. तसेच समस्येच्या मुळाशी जात त्यावर उपाय शोधणे हे त्यांच्या व्यक्तीमत्त्वाचे वैशिष्ट्य आहे.