पुणे : ज्येष्ठ पत्रकार विजय भोसले यांचे आज पिंपरी चिंचवड येथे हृदय विकाराने निधन झाले.ते ६१ वर्षांचे होते त्यांच्या मागे पत्नी ,मुलगा , मुलगी असा परिवार आहे.त्यांनी दीर्घकाळ पिंपरी चिंचवड मध्ये वार्तांकन केले, पुण्यातल्या सांजसमाचार या वृत्तपत्रासाठी अल्प काल काम केल्यावर त्यांनी दीर्घ काल ‘केसरी’ साठी त्यांनी विविध पदांवर काम पाहिले.. विधीमंडळाच्या अधिवेशनांचेही त्यांनी उत्तम वार्तांकन केले होते. त्यांच्या आकस्मिक निधनाने पत्रकारिता क्षेत्राला धक्का बसला.
चार दिवसांपूर्वी ते भोसरीतील एका रुग्णालयाच्या उद्घाटनसमयी वार्तांकनासाठी ते गेले तेव्हा तिथेच त्यांना अस्वस्थ वाटू लागल्याने उपचारासाठी दाखल करण्यात आले, त्यानंतर वायसीएम रुग्णालयात त्यांना हलविण्यात आले . उपचार सुरु असताना आज सकाळी त्यांना हृदयविकाराचा धक्का बसला त्यात त्यांची प्राणज्योत मालविली . त्यांच्या निधनामुळे पुण्यातील आणि पिंपरी परिसरातील पत्रकारिता ,सामाजिक , राजकीय क्षेत्रातून हळहळ व्यक्त होते आहे.