पुणे, : कोरोनामुळे शाळा, महाविदयालये बंद असली तरी दहावी आणि बारावीच्या राज्यातील अधिकाधिक विद्यार्थ्यापर्यंत ऑनलाइन शिक्षण पोहोचावे यासाठी सुरू केलेल्या ‘जिओ ज्ञानगंगा’ या वाहिन्यांच्या निर्मितीत डेक्कन एज्युकेशन सोसायटीच्या (डीईएस) शंभरहून अधिक शिक्षक आणि प्राध्यापकांनी मौल्यवान योगदान दिले आहे.
देशात पहिले लॉकडाउन जाहीर झाल्यानंतर विद्यार्थी शिक्षणापासून वंचित राहू नयेत यासाठी संस्थेने ऑनलाइन शिक्षण पद्धती विकसित करण्यासाठी तातडीने पावले उचलली होती. पहिल्याच टप्प्यात बहुतांश शिक्षकांचे प्रशिक्षण पूर्ण झाले होते. अशावेळी शिक्षण विभागाकडून विविध विषयांच्या तासिकांचे व्हिडीओ निर्मितीबाबत संस्थेकडे विचारणा करण्यात आली होती. अध्यक्ष डॉ. शरद कुंटे, उपाध्यक्ष महेश आठवले, कार्यवाह प्रा. धनंजय कुलकर्णी आणि नियामक मंडळातील सर्वच सदस्यांनी या प्रस्तावाला एका दिवसात मान्यता दिली. संस्थेच्या प्रबंधक डॉ. सविता केळकर यांची या प्रकल्पाचे समन्वयक म्हणून नियुक्ती करण्यात आली. एससीईआरटीचे उपसंचालक विकास गरड हे शासनाकडून समन्वयक म्हणून काम पाहात असून मोलाचे मार्गदर्शन करीत आहेत.
राष्ट्रीय शिक्षण देण्यासाठी १३० वर्षांपूर्वी संस्थेची स्थापना करण्यात आली होती. स्वातंत्र्य प्राप्तीनंतर सर्वसामान्य विद्यार्थ्यांना परवडेल असे किफायतशीर शुल्क आकारून गुणवत्तापूर्ण शिक्षण देण्यासाठी संस्था कार्यरत आहे. वेळोवेळी समाजाला दिशा देण्याचे आणि समाजोपयोगी उपक्रम राबविण्याचे काम संस्था करीत आहे. कोरोनाच्या विषाणूच्या संसर्गामुळे निर्माण झालेल्या आपत्कालिन परिस्थितीत शासनाला सहकार्य करण्याची भूमिका सर्वच शिक्षक आणि प्राध्यापकांनी घेतली. विशेष म्हणजे कोणतेही मानधन किंवा प्रवास भत्ता न घेता मोठ्या आनंदाने आणि सेवाभावी वृत्तीने हा प्रकल्प पूर्ण करण्याचा विश्वास सर्वांनी दिला.
इयत्ता दहावीसाठी मराठी व इंग्रजी माध्यम आणि इयत्ता बारावीसाठी कला, वाणिज्य आणि विज्ञान शाखांसाठी व्हिडीओ अभ्यासक्रमाच्या तासिका निर्माण करण्याचे निश्चित करण्यात आले. न्यू इंग्लिश स्कूल रमणबागच्या मुख्याध्यापिका तिलोत्तमा रेड्डी यांच्याकडे दहावी मराठी माध्यमाची आणि डीईएस इंग्लिश मीडियमच्या मुख्याध्यापिका ज्योती बोधे यांच्याकडे दहावी इंग्रजी माध्यमाची जबाबदारी सोपविण्यात आली. संस्थेच्या आजीव सदस्या डॉ. सविता केळकर यांच्याकडे बारावी कला, बृहन महाराष्ट्र वाणिज्य महाविद्यालयाचे प्राचार्य डॉ. चंद्रकांत रावळ यांच्याकडे बारावी वाणिज्य प्रमुख व रूपाली देशपांडे यांच्याकडे सहायक आणि फर्ग्युसन कनिष्ठ महाविद्यालयाचे उपप्राचार्य नारायण कुलकर्णी यांची बारावी विज्ञान शाखेचे प्रमुख आणि जयश्री पाटील यांची सहायक म्हणून नियुक्ती करण्यात आली.
लॉकडाउनच्या काळात प्रवास आणि एकत्र येउन चर्चा करण्यावर येणार्या मर्यादा, अध्यापनाचे नवीन माध्यम असल्याने येणारा तणाव, संवादासाठी समोर विद्यार्थी नसल्याने होणारी घालमेल, ग्रामीण भागातील विद्यार्थ्यांनाही सहज समजेल अशी सोप्या भाषेतील मांडणी, शिकविताना येणार्या तांत्रिक अडचणी या सर्व समस्यांवर यशस्वीपणे मात करीत विषयांचा सखोल अभ्यास, प्रदीर्घ अनुभव, शिकविण्याची हातोटी, सादरीकरणाची कला आणि तंत्रज्ञान व आधुनिक संपर्क साधनांचा प्रभावी वापर करून प्रकल्पाचे काम निम्म्याहून अधिक पूर्ण करण्यात आले आहे. यापैकी मराठी आणि इंग्रजी माध्यमातील दहावी, तसेच बारावीच्या विज्ञान शाखेसाठी जिओ टीव्हीवरील ‘ज्ञानगंगा’ या तीन शैक्षणिक वाहिन्यांचे ऑनलाइन उद्घाटन शालेय शिक्षणमंत्री वर्षा गायकवाड यांच्या हस्ते रविवारी करण्यात आले.
समाजाच्या शेवटच्या स्तरावरील विद्याथ्यापर्यंत गुणवत्तापूर्ण शिक्षण पोहोचविण्याचा एक छोटा प्रयत्न डेक्कन एज्युकेशन सोसायटीच्या शिक्षक आणि प्राध्यापकांना मिळाली. याचा फायदा शहरातील आणि ग्रामीय भागातील अधिकाधिक विद्यार्थ्यांना होईल अशी अपेक्षा आहे.
संपर्कासाठी डॉ. शरद कुंटे ९४२३०११८९९ प्रा. धनंजय कुलकर्णी ९२२५३४०९३३ तिलोत्तमा रेड्डी ९८५०८५८१५८ ज्योती बोधे ९४२२५१९८३५ डॉ. सविता केळकर ९२२५३४०९३० डॉ. चंद्रकांत रावळ ९८९०१३२१६६ नारायण कुलकर्णी ९९०७९६०९५६