पुणे-शौर्याचे प्रतिक म्हणून कोरेगाव-भीमा येथे उभारण्यात आलेल्या क्रांती स्तंभाच्या परिसरातील सुशोभिकरण आणि विविध प्रकारची विकासकामे करण्यासाठी एक कोटी रुपये उपलब्ध करून देण्यास स्थायी समितीने मान्यता दिल्याची माहिती अध्यक्ष हेमंत रासने यांनी आज पत्रकार परिषदेत दिली.रासने म्हणाले, ‘दरवर्षी एक जानेवारीला लाखो भीम अनुयायी क्रांतिस्तंभाला मानवंदना करण्यासाठी येत असतात. त्यांना चांगल्या प्रकारच्या मूलभूत सुविधा उपलब्ध व्हाव्यात यासाठी सुशोभिकरण आणि विकासकामे करण्याची आवश्यकता आहे. त्यासाठी एक कोटी रुपयांच्या निधीला मान्यता देण्यात आली.’
मिनाताई ठाकरे रुग्णालयात डायलेसिस केंद्र
कोंढवा पुणे महापालिकेच्या मिनाताई ठाकरे रुग्णालयात न्यू ग्लोबल फाउंडेशनच्या संयुक्त विद्यमाने १० खाटांचे डायलेसिस केंद्र पी. पी. पी. तत्वावर सुरू करण्यास स्थायी समितीने मान्यता दिल्याची माहिती अध्यक्ष हेमंत रासने यांनी आज पत्रकार परिषदेत दिली.
रासने म्हणाले, ‘शहरातील मधुमेह आणि हृदयरोगाच्या रुग्णांची संख्या वाढत आहे. किडनीचे आजार वाढत असून, त्याचा परिणाम रुग्णांचे मूत्रपिंड निकामी होण्यात होतो. या रुग्णांना डायलेसिसचे उपचार घ्यावे लागतात. हे उपचार महागडे असतात. ते सर्वसामान्य रुग्णांना परवडत नाहीत. त्यामुळे मिनाताई ठाकरे रुग्णालयात डायलेसिस केंद्र सुरू करण्याचा निर्णय घेण्यात आला. प्रति डायलेसिस ३५७ रुपये दर आकारण्यात येणार आहे. हा प्रकल्प दहा वर्षांच्या मुदतीच्या कराराने चालविण्यासाठी आवश्यक तो करार करण्यास् स्थायी समितीने मान्यता दिली.’
महापालिका शाळातील दहावी, बारावी गुणवंतांना मिळणार ५१ हजार रुपये
पुणे महापालिका शिक्षण विभागाच्या माध्यमिक शाळांतील दहावी आणि बारावीच्या परीक्षेत अनुक्रमे ८५ टक्के आणि ८० टक्क्यांपेक्षा अधिक गुण मिळविणार्या गुणवंत विद्यार्थ्यांना शारदाबाई पवार योजनेअंतर्गत प्रत्येकी ५१ हजार रुपये देण्यात येणार असल्याची माहिती स्थायी समितीचे अध्यक्ष हेमंत रासने यांनी आज पत्रकार परिषदेत दिली.
रासने म्हणाले, या वर्षी इयत्ता दहावीच्या १५८ आणि इयत्ता बारावीच्या ३०३ अशा एकूण ४६१ विद्यार्थ्यांना या योजनेअंतर्गत प्रत्येकी ५१ हजार रुपये देण्यात येणार आहेत. त्यासाठी २ कोटी ३५ लाख ११ हजार रुपये खर्च अपेक्षित आहे. त्यासाठी अंदाजपत्रकात एक कोटी पन्नास लाख रुपयांची तरतूद करण्यात आली होती. उर्वरित एक कोटी रुपयांचे वर्गीकरण पाचवी ते दहावी विद्यार्थ्यांसाठी पीएमपीएमएल मोफत बससेवेच्या तरतुदीतून करण्यात आले आहे. या वर्षी पहिल्या सत्रात शाळा सुरू नसल्याने एकूण सात कोटी रुपयांपैकी बहुतांश तरतूद शिल्लक असल्याने त्यापैकी एक कोटी रुपयांचे वर्गीकरण करण्याचा निर्णय घेण्यात आला.’
पाषाण आणि भांबुर्डा येथे पाण्याच्या टाक्यांसाठी भूसंपादनास निधी
समान पाणीपुरवठा योजनेअंतर्गत पाषाण आणि भांबुर्डा येथे टाक्या उभारण्यासाठी वन विभागाकडून भूसंपादन करण्यास आवश्यक असणारा निधी उपलब्ध करून देण्यास स्थायी समितीने मान्यता दिल्याची माहिती अध्यक्ष हेमंत रासने यांनी आज पत्रकार परिषदेत दिली.
रासने म्हणाले, ‘समान पाणीपुरवठा योजनेअंतर्गत शहरात ८२ टाक्या उभारण्याचे नियोजन करण्यात आले आहे. त्यापैकी दोन टाक्या पाषाण आणि भांबुर्डा, शिवाजीनगर येथे आहेत. या जागा वन विभागाच्या अखत्यारीत आहेत. पाषाण येथे ०.५७१ हेक्टर आणि भांबुर्डा येथे ०.७०३१ हेक्टर जागा संपादन करण्यात येणार आहे. त्यासाठी अनुक्रमे ११ लाख ७४ हजार आणि १३ लाख ९२ हजार रुपये असे एकूण २५ लाख ६८ हजार रुपये उपलब्ध करून देण्यात आले आहेत.’